स्याङ्जामा होटलमा तास खेल्ने व्यापारी र नेतासहित ८ जना पक्राउ

१९ भदौ, स्याङ्जा । घर छाडेर होटलमा गएर तास खेल्ने स्याङ्याजाका व्यवसायी, नेता र बैंकमा काम गर्ने कर्मचारीसहित ८ जना पक्राउ परेका छन् । जिल्ला प्रहरी प्रमुख एसपी होविन्द्र बोगटीका अनुसार बिहीबार वालिङ नगरपालिका–८, कटौजेमा विवेक तिवारीले चलाएको प्रसाद होटलमा जुवा खेलिरहेको अवस्थामा ८ जना पक्राउ परेका हुन् ।

विशेष सूचनाको आधारमा प्रहरीले छापा मार्दा पक्राउ परेका व्यक्तिको साथबाट १ लाख ६७ हजार एक सय ७९ रुपैयाँ बरामद भएको प्रहरीले जनाएको छ । पक्राउ परेका अभियुक्तहरुमाथि जुवा सम्बन्धी कसुरमा अनुसन्धानका लागि ७ दिनको म्याद थप गरिएको छ । उनीहरुमाथि थप अनुसन्धान भइरहेको प्रहरीले जनाएको छ ।