नेता, कर्मचारी र ठोकेदारलाई कारवाही गर्ने विप्लवको चेतावनी

२१ भदौ, काठमाडौं । नेत्रविक्रम चन्द विप्लव नेतृत्वको नेपाल कम्युनिष्ट पार्टीले फेरि आफ्ना गतिविधि तीव्र बनाउने बताएको छ । पछिल्लो समय सरकारबाटै संरक्षित भष्ट कर्मचारी, ठेकेदार र पार्टीको नाममा चन्दा आतंक मच्चाउनेलाई कारबाही गर्ने चेतावनी विप्लव समूहले दिएको छ ।

विप्लव समूहका प्रवक्ता खड्ग विश्वकर्मा ‘प्रकाण्ड’ले विज्ञप्ति जारी गर्दै देशको उत्पादनलाई धरापमा पार्ने, किसानहरूको टाउकोमा गिर खेल्ने, मल आपुर्ति गर्ने ठेक्का लिएर पुरा नगर्ने कम्पनी एवं ठेकदार र रेलमार्गको निर्माणको नाममा अर्बौं रकमको भ्रष्टाचारको खेल गर्ने रेल विभागका महानिर्देशक र ठेकेदार गिरोहलाई तुरुन्तै आफूले कारबाही गर्ने निष्कर्षमा पुगेको चेतावनी दिएका हुन् ।

यद्यपि उनले सरकारले उनीहरुलाई कारबाही गर्नुपर्न माग गरेका छन् । आफ्नो पार्टीलाई कानुन हातमा लियो भनेर राज्यले नै जनतामाथि आतंक मच्चाएको प्रकाण्डको आरोप छ । पूर्वपश्चिम रेलमार्गको परियोजनाको नाममा काकडभिट्टा–इनरुवा खण्डमा माटो भर्ने योजना सरकारको यातायात मन्त्रालय अन्तर्गतको रेल विभागले ३३ अर्ब माथिको ठेक्का मुआब्जा वितरण नगरी, प्राविधिक एवं आर्थिक मूल्याङ्कन बिना नै आफ्नै राज्यको कानुन विपरीत यातायात मन्त्रालय, रेल विभागकf महानिर्देशक बलराम मिश्र, कथित सिण्डिकेटधारी ठेकेदार एवं कम्पनी शर्मा एण्ड कम्पनीका रमेश शर्मा, गोल्डेन गुड्स कम्पनीका ग्याल्जे शेर्पा, कालिका कम्पनीका विक्रम पाण्डे र लामा कम्पनीका जीपछिरिङ्ग लामा लगायतको गिरोहले ६ अर्बभन्दा माथिको कमिसनको खेल र सेटिङ्गमा नेपाली जनताको सम्पत्ति लुट गर्ने डिजाइन गर्दा पनि राज्य चुपचाप लागेको उनको भनाई छ ।