कांग्रेसका जनप्रतिनिधिलाई सरकारले सहयोग गर्दैन : मेयर पराजुली

३० भदौ, मोरङ । विराटनगर महानगरपालिकाका मेयर भीम पराजुलीले सीमामा थप कडाई गरिदिन सरकारसँग माग गरेका छन् । विराटनगरमा पत्रकारसँग कुराकानी गर्दै मेयर पराजुलीले कोरोनाका कारण विराटनगरमा १८ जनाको मृत्यु हुनुका साथै एक हजारभन्दा धेरै संक्रमित भएकाले भारतसँगको सीमानाका कडाई गरिदिन माग गरेका हुन् ।

कांग्रेसबाट विजयी भएका मेयर पराजुलीले संघीय सरकारबाट पाउनुपर्ने सहयोग नपाएको समेत गुनासो गरेका छन् । सरकारले आफूनिकट पार्टीका नेता, कार्यकर्ता र जनप्रतिनिधिलाई मात्रै सहयोग गर्ने गरेको भन्दै मेयर पराजुलीले सरकारकै लापरबाहीले गर्दा सीमानाकाबाट कोरोना संक्रमित भित्रिरहेका पनि बताए ।

समुदायस्तरमा फैलिसकेको कोरोना भाइरसको संक्रमणलाई नियन्त्रण गर्नु चुनौतिपूर्ण रहेको उनको भनाई छ ।