लमजुङमा पनि ६ महिनापछि पुनः यातायात सञ्चालन

१ असोज, लमजुङ । लमजुङमा कोरोनाको त्रास तथा लकडाउनका कारण सार्वजनिक सवारीसाधन ठप्प भएको करिब ६ महिनापछि यातायात सञ्चालनमा आएको छ । कोभिड १९ का कारण गत चैत ११ गतेबाट बन्द रहेको यातयात सेवा आजबाट पुनः सञ्चालनमा आएको हो ।

यतिबेला लामो तथा छोटो दूरीका सवारी साधन चल्न थालेको छ । यातायात व्यवसायीले स्वास्थ्य सुरक्षालाई मध्यनजर गर्दै लामो तथा छोटो दूरीका सवारी साधन चलाइएको छ । लमजुङबाट काठमाडौं, पोखरा, चितवनलगायत ठाउँसम्म सवारी सञ्चालन भएको छ ।

लमजुङकालिका यातायात सञ्चालन प्रा।लि।का अध्यक्ष कृष्णबहादुर अधिकारीले आधा सङ्ख्यामा यात्रु राखेर सवारी सञ्चालन गरिएको बताए । सवारी सञ्चालनमा आएपनि पहिलो दिन भएकाले यात्रुहरु कम आएको चालकको भनाइ छ ।