सार्वजनिक गाडीमा सिटभरी यात्रु राख्न पाउनुपर्ने व्यवसायीको माग

४ असोज, काठमाडौं । यातायात व्यवसायीले सार्वजनिक गाडीमा पनि सिटभरी यात्रु राख्न पाउनुपर्ने माग गरेका छन् । विमानमा सिटभरी यात्रु राख्न पाउने तर सार्वजनिक गाडीमा यात्रु राख्न नदिएको भन्दै व्यवसायीले गुनासो गरेका हुन् ।

सरकारले भोलिदेखि शुरु हुने आन्तरिक उडानमा सिटभरी यात्रु राख्न छुट दिएको छ । तर सार्वजनिक गाडीमा आधा यात्रु राख्न र भाडा दोब्बर लिन भनेको छ । यसरी आफूलाई घाटा भएको भन्दै यातायात व्यवसायीले सिटभरी यात्रु राख्न पाउनुपर्ने माग गरेका हुन् ।

आन्तरिक वायुसेवा र बसमा पूर्ण क्षमता यात्रु चढाउनुबीच कुनै अन्तर नभएको बताउँदै पुरै बसलाई यात्रु बोक्न दिनुपर्ने नेपाल यातायात व्यवसायी राष्ट्रिय महासंघका महासचिव सरोज सिटौलाले बताए ।

उनले पुरै सिट क्षमता यात्रु बोक्न दिए ५० प्रतिशत बढी भाडा लिनु नपर्ने पनि बताए । तर सरकारले गाडीमा पूरा सिटभरी यात्रु राख्न दिएको छैन् ।