भत्केको सिंचाई नहर पुर्ननिर्माणमा जुटे चापाकोट नगरका प्रमुख गिरि

११ असोज, स्याङ्जा । केही दिनदेखि परेको अविरल बर्षाका कारण स्याङ्जाको चापाकोटस्थित चापाकोट टार सिंचाई योजनाको नहर भत्केको छ । हजारौं हेक्टर जमिनमा सिंचाई गर्ने एकमात्र आधार चापाकोट टार सिंचाई नहर पहिरोका कारण भत्केसँगै चापाकोटका हजारौं कृषक चिन्तित बनेका छन् ।

आइतबार उक्त सिंचाई नहर भत्केको ठाउँमा प्रत्यक्ष निरीक्षण गर्न भन्दै चापाकोट नगरपालिकाका नगरप्रमुख शिवकुमार गिरि र कांग्रेसका चापाकोट नगर सभापति रामचन्द्र पंगेनीसहित स्थानीयबासीले सो नहरको स्थलगत अवलोकन गरेका छन् ।

चापाकोट कृषि उत्पादनका दृष्टिकोणले अब्बल मानिएको ठाउँ भएको र सुन जस्तै पहेँला झुल्केका बालासहितको धान आम कृषकको खेतमा फलाउन आफुले मरिमेटेर भएपनि भत्केको सिंचाई नहर मर्मत गर्ने अठोट लिएको नगरप्रमुख गिरिले स्थानीयबासी माझ व्यक्त गरेका छन् ।

यहि मेसोमा कांग्रेस चापाकोट नगरका सभापति रामचन्द्र पंगेनीले चापाकोट नगरपालिकाको स्थानीय सरकार आम चापाकोटबासीको समस्यामा जहिले पनि समस्या समाधानको लागि मेरुदण्ड बनेर काम गर्ने कुरा व्यक्त गरेका छन् । सो बेला सिंचाई नहर भत्केकै दिनदेखि नगरप्रमुख गिरिले पुर्ननिमार्णका लागि आवश्यक कदम छिटो र छरितो तबरबाट उठाएकोमा नगरप्रमुख गिरिलाई पंगेनीले धन्यवाद समेत दिएका थिए ।

अहिले उक्त सिंचाई नहर भत्केको ठाउँमा आवश्यक जनशक्ति र मेशिनको परिचालन गरेर पुनर्निर्माण गर्ने काम भैरहेको छ।
पहिरोले भत्काएको नहर पुनर्निर्माण हुने भएपछि चापाकोटका स्थानीय कृषक भने खुशी भएका छन् ।