दिल्लीले बेंग्लोरलाई दियो १९७ रनको लक्ष्य, स्टोईनिसको अर्धशतक

१९ असोज, एजेन्सी । आईपीएल क्रिकेटमा दिल्ली क्यापिटल्सले बेंग्लोरलाई १ सय ९७ रनको लक्ष्य दिएको छ । टस हारेर पहिले व्याटिङ गरेको दिल्लीले निर्धारित २० ओभरमा ४ विकेट गुमाएर १ सय ९६ रन बनाएको हो ।

उसका लागि मार्कुस स्टोईनिसले उत्कृष्ट प्रदर्शन गरे । पाँचौ नम्बरमा व्याटिङमा आएका उनले अर्धशतक बनाउँदै ५३ रन बनाए । २६ बल मात्रै खेलेका उनले ६ चौका र २ छक्काको मद्दतमा अर्धशतक जोडेका हुन् ।

यस्तै पृथ्वी शाले ४२, रिसश पन्तले ३७, शिखर धवनले ३२ रन बनाए । बेंग्लोरका मोहम्मद सिरजले २ विकेट लिए ।

१९७ रनको विशाल लक्ष्य पछ्याएको बेंग्लोरले भने खराब शुरुवात गरेको छ । उसका ओपनर व्याट्सम्यान देवदुत पाडिकल ४ रनमै आउट भएका छन् ।

यसअघि पाडिकलले दुई अर्धशतक बनाएका थिए । आजको खेल जित्ने टोली आईपीएलको शीर्ष स्थानमा उक्लिनेछ ।