प्रदेश ५ सरकारको प्रस्तावको विपक्षमा मतदान गर्न कांग्रेसको ह्वीप जारी

२० असोज, बुटवल । नेपाली कांग्रेसले प्रदेश नम्बर ५ को स्थायी राजधानी दाङ देउखुरीको विपक्षमा मतदान गर्न ह्विप जारी गरेको छ। कांग्रेसले बुटवलमै राजधानी बनाउन माग गर्दै आएको छ ।

मंगलबार बस्ने प्रदेश सभा बैठकमा मतदान प्रक्रियाबाट राजधानी तोक्ने निर्णय हुन सक्ने भएकोले दाङ देउखुरीको विपक्षमा मतदान गर्न कांग्रेस संसदीय दलले ह्विप लगाएको हो।

प्रदेश सरकारको निर्णयपछि आन्तरिक मामिला तथा कानुनमन्त्री कुलप्रसाद केसीले स्थायी राजधानी दाङ देउखुरी र प्रदेशको नाम लुम्बिनी प्रस्ताव प्रदेश सभामा लगेका थिए। यसअघि हिजो मन्त्री केसीले प्रस्ताव पेश गर्दा कांग्रेस सांसदले प्रदेशसभामा तोडफोड गरेका थिए ।