राजस्थानलाई हराउदै मुम्बई फेरि शीर्ष स्थानमा

२१ असोज, एजेन्सी । आईपीएल क्रिकेटमा मुम्बई इण्डियन्सले राजस्थान रोयल्सलाई ५७ रनले हराएको छ । दुबईमा मुम्बईले दिएको १९४ रनको लक्ष्य पछ्याएको राजस्थान १८ ओभर १ बलमा सबै विकेट गुमाएर १३६ रनमा अलआउट भएपछि हिटम्यान रोहित शर्माको टिम ५७ रनले विजयी भएको हो ।

राजस्थानका लागि जोश बटलरले ७० रन बनाउनुबाहेक अरुले गतिलो प्रदर्शन गर्न सकेनन् । मुम्बईका जस्प्रित बुम्राहले ४ विकेट लिए । त्यसअघि टस जितेर पहिले व्याटिङ गरेको मुम्बईले निर्धारित २० ओभरमा ४ विकेट गुमाएर १९३ रन बनाएको थियो ।

उसका लागि सुर्यकुमार यादवले नटआउट ७९ रन बनाए भने रोहित शर्माले ३५ रनको योगदान दिए । राजस्थानका श्रेयास गोपालले २ विकेट लिए । जितसँगै मुम्बई ६ खेलबाट ८ अंकका साथ लिग तालिकाको शीर्ष स्थानमा उक्लिएको छ । एक खेल कम खेलेको दिल्ली समान अंकसहित दोस्रो स्थानमा छ भने ६ अंक जोडेको बेंग्लोर तेस्रो स्थानमा छ ।