डा.केसीको जीवन रक्षा गर्न चिकित्सक संघको माग, भोलिदेखि सेवा बहिष्कारको घोषणा

२१ असोज, काठमाडौं । २४ दिनदेखि अनशनरत डा. गोविन्द केसीको जीवन रक्षा गर्न माग गर्दै डाक्टरहरु आन्दोलित भएका छन् । नेपाल चिकित्सक संघले ७२ घण्टे अल्टिमेटम सकिएलगत्तै देशभर आन्दोलनको घोषणा गरेको हो ।

यसक्रममा भोलि २२ गते बिहान ९ देखि ११ बजेसम्म देशभरका स्वास्थ्य संस्था तथा अस्पतालहरुमा आकस्मिक र कोभिड १९का सेवा बाहेक अन्य स्वास्थ्य सेवा बहिस्कार गर्ने निर्णय चिकित्सक संघले गरेको छ । यस्तै जनस्वास्थ्यका मापदण्ड तथा सामाजिक दुरी कायम गरेर धर्ना दिने समेत संघले बताएको छ ।

पर्सि २३ गते देशभर आकस्मिक र कोभिड १९का सेवा बाहेक अन्य स्वास्थ्य सेवा बहिस्कार गर्ने र अर्को सूचना नआएसम्म कालोपट्टी बाँधेर काम गर्ने संघले जारी गरेको प्रेस विज्ञप्तीमा उल्लेख छ । साथै यो अवधिमा पनि वार्ता टोली गठन नभए आकस्मिक सेवा पनि रोकेर सडक आन्दोलनमा आउने चिकित्सक संघको चेतावनी छ ।

यसअघि नेपाली कांग्रेस लगायतका विभिन्न दलका नेता तथा संघ संस्थाले समेत डा.केसीको जीवन रक्षा गर्न सरकारसँग माग गरिरहेका छन् । तर सरकारले अहिलेसम्म डा.केसीसँग वार्ता गरेको छैन् भने माग सम्बोधन गर्न बेवास्ता गरेको छ ।