डा. केसीसँग वार्ता गर्न सरकारी वार्ता टोली

२१ असोज, काठमाडौं । २४ दिनदेखि अनसनरत डा. गोविन्द केसीका माग सम्बोधन गर्न सरकारले वार्ता समिति गठन गरेको छ । शिक्षा, विज्ञान तथा प्रविधि मन्त्रालयका सचिव गोपी मैनालीको नेतृत्वमा सरकारले तीन सदस्यीय वार्ता समिति गठन गरेको हो ।

वार्ता समितिमा स्वास्थ्य तथा जनसंख्या मन्त्रालयका सहसचिव डा. गुणराज लोहनी र चिकित्सा शिक्षा आयोगका निर्देशक दिलिप शर्मा सदस्य छन् । डा.केसीसँग वार्ता गर्ने टोली नै गठन नगरेपछि चिकित्सक संघले आन्दोलनको घोषणा गरेको थियो ।

यसलगत्तै सरकारले वार्ता समिति गठन गरेको हो । वार्ता टोलीले भोलिदेखि डा.केसीसँग वार्ता शुरु गर्ने जनाएको छ । सचिव मैनालीले यसअघि हिजो नै शिक्षण अस्पताल पुगेर डा.केसीको स्वास्थ्य अवस्था बुझ्नुका साथै अनसन स्थगित गर्न आग्रह गरेका थिए । जवाफमा डा.केसीले अनसन नरोक्ने बताएका थिए ।