वार्ता नभए आन्दोलन थाल्ने डा.केसी पक्षको चेतावनी

२३ असोज, काठमाडौं । हिजो शुरु भएको वार्ता आज निरन्तरता नदिए डा.गोविन्द पक्षको वार्ता समूहले आन्दोलन गर्ने चेतावनी दिएको छ । अनसनरत डा. केसीको मागका विषयमा आज पनि सरकारसँग वार्ता भएपनि सरकारी वार्ता टोली छलफलबाट पन्छिदा डा.केसी पक्ष अन्यौलमा परेको हो ।

डा.केसीका मागमा सरकार गम्भिर नदेखिएको र माग सम्बोधन गर्नेभन्दा वार्ताबाटै भाग्ने प्रयास गरेकाले अब आन्दोलनको विकल्प नभएको डा.केसी पक्षका वार्ता समितिका सदस्यले बताएका छन् ।

बेलूकी ५ बजेसम्म वार्ता शुरु नभए सडकमा चिकित्सक उतारेर आन्दोलन चर्काउने डा.केसी पक्षका वार्ता समिति सदस्यहरुको भनाई छ । सिंहदरबारस्थित शिक्षा मन्त्रालयमा बिहीबार भएको वार्तामा डा केसीले उठाएका मागका विषयमा छलफल भएको थियो। बिहान साढे १० बजेदेखि बसेको वार्ता राती १० बजेसम्म पनि निष्कर्षमा पुग्न नसकेपछि आज थप छलफल गर्ने योजना थियो ।

तर सरकारी वार्ता टोली शुक्रबार भने वार्तामै बस्न पन्छिएपछि डा.केसी पक्ष आन्दोलनमा जाने तयारी गरेको हो । डा.केसीको स्वास्थ्य अवस्था जटिल बनेपनि सरकारी वार्ता टोलीले अनसनमा उठाएका मागलाई गम्भिरसँग नलिएको उनीहरुको भनाई छ ।