सरकारी अस्पतालमै कोरोना आतंक, विरामीबाट शुल्क असुल्न शुरु

३ कात्तिक, काठमाडौं । कोरोना भाइरसबाट संक्रमित भएकाहरुबाट सरकारी अस्पतालले नै शुल्क असुल्न शुरु गरेका छन् । काठमाडौंकै सिभिल अस्पतालले संक्रमितहरूले आफैंले उपचार खर्च र खाना खर्च बेहोर्न कोरोना पीडितका नाममा सूचना जारी गर्दै शुल्क आतंक शुरु गरेको हो ।

‘नेपाल सरकार स्वास्थ्य तथा जनसंख्या मन्त्रालयको निर्णयानुसार यस अस्पतालमा कोराना संक्रमण भई उपचाररत बिरामीहरुले कात्तिक २ गतेदेखि लागू हुने गरी सम्पूर्ण खर्च बिरामी स्वयंले बेहोर्नुपर्ने जानकारी गराइन्छ’ अस्पतालले जारी गरिएको सुचनामा भनिएको छ, ‘खाना अस्पताल क्यान्टिनमा नगद धरौटी राखी उपलब्ध हुने व्यहोरा जानकारी गराइन्छ ।’

स्वास्थ्य मन्त्रालयले हिजोदेखि बिरामीले उपचार शुल्क आफैले तिर्नुपर्ने जनाएको थियो । सरकारको सोही निर्णय कार्यान्वयन गर्न अस्पताल अघि सरेका हुन् । अब हरेकजसो बिरामी संक्रमित भएर अस्पताल भर्ना हुनुपरेमा पहिले बैंकमा शुल्क बुझाउनुपर्नेछ भने त्यसपछि मात्रै बिरामीको उपचार शुरु हुनेछ । सरकारको यो गैरजिम्मेवार निर्णयको चौतर्फी आलोचना भइरहेको छ ।