नाग्म गमगडी सडक छिटो सम्पन्न गर्न माग

२० कार्तिक, खलङ्गा । नाग्म गमगडी सडक खण्डको स्तरोन्नतिको काम छिटो सम्पन्न माग गरिएको छ । सडक डिभिजन कार्यालय जुम्लाका इञ्जिनियर प्रमुख लिला भण्डारीले नाग्म गमगडी सडक स्तरोन्नती कार्य छिटो सम्पन्न गर्न पहल भइरहेको जानकारी दिए।

केही ठेकेदारले काम छाडेर गएपछि सो सडक स्तरोन्नतिमा ढिलाइ भएको उनले बताए । सांसद गजेन्द्रबहादुर महतले आफ्नो नेतृत्वको टोलीले सडक डिभिजन कार्यालयमा पुगी सडक स्तरोन्नतिमा कामको बारेमा गम्भीर बन्न सुझाव दिएको जानकारी दिए ।

कर्णाली प्रदेशसभा सदस्य पूर्णप्रसाद धितालले नाग्म गमगडी सडकमा उत्पन्न समस्या समाधान गर्ने प्रतिबद्धता कार्यालय प्रमुख भण्डारीले गरेको बताए । उनले भने, “अटेर गरेमा कार्वाही अगाडि बढाउने र नाग्म देखिमाथि बाँकी रहेको पाँच किलोमिटर सडकको काम तत्काल गराउने आश्वासन दिइएको छ ।”ठेकेदार कृष्ण खड्काबाट पेटि ठेक्का लिएका यहाँका राजुसिंह र तारासिँह कठायतले काम गर्न सो सडक निर्माणको काम तत्काल शुरु गर्न लगाउने कार्यालयले जनाएको छ ।

गत बर्षको ५२ करोड बजेट मध्ये १० करोड मात्र खर्च भएको थियो । बाँकी ४२ करोड रुपैँया कामै नभएर फ्रिज भएको थियो । यस बर्ष रु २३ करोड १३ लाख रकम आवश्यक छ । कार्यालय प्रमुख भण्डारीले भने,“अपुग रकम उपलब्ध गराउन माग गरिएको छ । ।”उनले सडक ग्राबिलिङ गर्न रोलर र पानी ट्याङ्कर नभई पास नहुने, मापदण्ड नपुगेका सडक पास नगर्ने र सबै सरोकारवालहरुको सहभागीतामा सडकको अनुगमन गर्ने जनाए ।