मायालु जून

एउटा जून
डाँडामाथि देखापर्छ
बिस्तारै बिस्तारै ओर्लन्छ–
कुवाभित्र पस्छ
खोला किनारमा पुग्छ
सायद, खोजिरहन्छ रातको छातीभित्र
आफ्नो मायालु ।

त्यो जून
चढ्छ रुखको पाखुरामाथि–माथि
पात–पातमा
हाँगा–हाँगामा ।

यताउता
भेटिन्छ हरेक घरको सङ्घारमा
कुना–कुनामा
झ्यालहरूमा
गल्लीतिर
र,
देखा पर्दैन फेरि कतै ।

ओ प्रिय,
आइपुगेर मेरो मनको आकाशमा तिमी
चम्कन्छौ एउटा मायालु जून ।