क्रिकेट प्रतियोगिताको उद्घाटन खेलमा हनुमाननगर विजयी

♦ धीरुभाइ

४ मंसिर, सप्तरी । सप्तरीको तिलाठी कोइलाडी गाउँपालिका वडा नं. ४ कोइलाडीका यूवाहरुले सञ्चालन गरेको गजेन्द्र नारायण सिंह स्मृति टी ट्वान्टी क्रिकेट प्रतियोगिताको शनिबार एक कार्यक्रम बीच राष्ट्रिय सभा सदस्य शेखरकुमार सिंहले उद्घाटन गरे ।

राष्ट्रिय सभा सदस्य सिंहले ब्याटिङ र वडा अध्यक्ष गोपी मण्डलले बलिङ गरी प्रतियोगिताको उद्घाटन गरे । शनिबार सम्पन्न उद्घाटन खेलमा हनुमाननगरले महादेवालाई ५२ रनले पराजित गरेको छ । टस हारेर ब्याटिङ गरेको हनुमाननगरले निर्धारित १५ ओभरको खेलमा ५ विकेट गुमाई १६५ रन बनाएको थियो ।

जसमा अमित मण्डलले ४८, चन्द्रपालले ३४, दिपक भुजेल र साकेत सिंहले समान १८-१८ रन बनाएका थिए, भने महादेवाका हरि मण्डलले २ तथा कामदेव अधिकारी र नरेश अधिकारीले १-१ विकेट लिएका थिए । जवाफमा महादेवा टिम ११ ओभरमा ११३ रनमा अल आउट हुन पुग्यो ।

महादेवाकालागि हरि मण्डलले ३४, नरेश मण्डलले २१ र विरेन्द्र अधिकारीले २० रन बनाएका थिए भने हनुमाननगरकालागि अमोद मण्डलले ३, चन्द्रपाल र साकेत सिंहले २-२ तथा दिपक भुजेल र राजु मण्डलले १-१ विकेट लिएका थिए ।

उक्त खेलमा हनुमाननगरका चन्द्रपाललाई म्यान अफ द म्याच घोषित गरियो । प्रतियोगिताअन्तर्गत आइतबार तिलाठी र कुनौलीबीच खेल हुने आयोजक समितिका नरेश मण्डलले जानकारी दिए ।