चिसो छल्न आगो बाल्दा बालकको मृत्यु, दुई जना घाइते

५ पुष, विराटनगर । चिसो छल्न आगो बालेर ताप्दा एक बालकको मृत्यु भएको छ । चिसो भगाउन भन्दै बालेको घुरको आगोले घर जल्दा एक बालकको मृत्यु हुनुका साथै दुई जना घाइते भएका छन् ।

शनिबार राति करिब साढे १२ बजे घुरमा बालेको आगोले घर जल्दा विराटनगर महानगरपालिका–१४ झटीयाहीका राजेशकुमार दास तत्माका १४ वर्षीय छोरा रविनको मृत्यु भएको हो । उनकी श्रीमती ३२ वर्षीया इन्दुदेवी र सात वर्षीय छोरा किसनकुमार घाइते भएका छन् ।

घाइते आमा–छोरा दुवैको कोशी अस्पताल विराटनगरमा उपचार भइरहेको छ । उनीहरुको अवस्था खतरामुक्त रहेको प्रहरीले जनाएको छ । राति बालेको घुर ननिभाई सुतेका कारण घरमा सल्किएर आगलागी भएको प्रारम्भिक अनुसन्धानबाट खुलेको प्रहरीले जनाएको छ ।