श्रेष्ठलाई पत्रकार महासंघका संस्थापक अध्यक्ष घोषणा गर्न माग

१३ पुष ,काठमाडौं । सञ्चार तथा सूचना प्रविधिमन्त्री पार्वत गुरुङले प्रविधिको विकाससँगै नेपाली पत्रकारिता क्षेत्रलाई आधुनिकतासँग जोड्नुपर्ने बताएका छन् ।

नेपाल पत्रकार संघका संस्थापक सत्यनारायणबहादुर श्रेष्ठको १०५औँ स्मृतिका अवसरमा नेवाः पत्रकार राष्ट्रिय दबूद्वारा यहाँ आज आयोजित कार्यक्रममा मन्त्री गुरुङले नेपाली पत्रकारिता क्षेत्रलाई आजको युग सुहाउँदो बनाउनुपर्ने बताए ।

मन्त्री गुरुङले २००८ सालमै महासङ्घको स्थापना गरेर श्रेष्ठले नेपालको प्रजातान्त्रिक आन्दोलन र पत्रकारिता क्षेत्रको विकासमा पु¥याएको योगदान उल्लेखनीय रहेको बताए । सरकारका प्रवक्ता गुरुङले महासंघलगायत सरोकार निकायसँग छलफल गरेर महासंघका संस्थापक अध्यक्षबारे आवश्यक निर्णय लिइने जवाफ दिए ।

पत्रकार राष्ट्रिय दबूका अध्यक्ष सुरवीर बज्राचार्यले श्रेष्ठलाई नै महासंघको संस्थापक अध्यक्ष घोषणा गर्न मन्त्री गुरुङको ध्यानाकर्षण गराएका थिए । उपाध्यक्ष दिलीप थापा मगरले श्रेष्ठ महासंघका संस्थापक अध्यक्ष थिए भन्ने प्रमाण आफ्नो संस्थाले नै खोज्ने प्रतिबद्धता व्यक्त गरे ।