हुस्सुले विमानस्थल ठप्प, उडान प्रभावित !

२१ पुष, काठमाडौं । बाक्लो हुस्सु र तुवाँलोले गर्दा आन्तरिक हवाई उडान प्रभावित भएको छ । बाक्लो तुँवालो र हुस्सुले गर्दा मंगलबार विहान तराईका तीन वटा विमानस्थल ठप्प बनेका छन् ।

त्रिभुवन विमानस्थल कार्यालयका कार्यबाहक महाप्रबन्धक देवचन्द्रलाल कर्णका अनुसार विराटनगर, जनकपुर र भैरहवा विमानस्थलमा न्यून भिजिविलिटीका कारण उडान अवतरण ठप्प छ । अन्य विमानस्थलमा भने उडान–अवतरण भइरहेको छ ।

काठमाडौं विमानस्थलमा भने सोमबार र मंगलबार साविकमा जस्तै उडान अवतरण छ । काठमाडौंमा सामान्यतया १ हजार मिटरसम्म भिजिबिलिटी भए उडान–अवतरण हुन्छ ।

मंगलबार ४ हजार मिटरसम्मको भिजिविलिटी रहेका कारण त्रिभुवन विमानस्थलबाट हुने उडान–अवतरणमा समस्या थिएन । अन्तर्राष्ट्रिय उडान समेत भइरहेका छन् ।

मंगलबार हङकङबाट नेपाल एयरलाइन्स, दोहाबाट कतार एयरवेज, दुबईबाट नेपाल एयरलाइन्स, दिल्लीबाट एयर इण्डिया, दमामबाट हिमालय एयरलाइन्स र दोहाबाट आएको नेपाल एयरलाइन्सका जहाज अवतरण गरिसकेका छन् ।

तर काठमाडौं उपत्यका बाहिरका विमानस्थलमा भने हुस्सुका कारण उडान अवतरण प्रभावित छ । यसअघि हिजो हिमपातका कारण जुम्ला र हुम्लाको विमानस्थल ठप्प भएका थिए ।