इन्फ्रास्ट्रक्चर बैंकको आईपीओ भर्ने भोलि अन्तिम दिन !

५ माघ, काठमाडौं । नेपाल इन्फ्रास्ट्रक्चर बैंकको आईपीओ भर्ने भोलि अन्तिम दिन रहेको छ । बैंकले माघ २ गतेबाट बिक्री खुल्ला गरेको ८ अर्ब रुपैयाँ बराबरको ८ करोड कित्ता आईपीओ आवेदन दिने भोली (माघ ६ गते मंगलबार) अन्तिम दिन हो । हालसम्ममा बैंकले निष्कासन गरेको आइपीओ भर्ने लगानीकर्ताको संख्या ११ लाख ७७ हजार ९२० जना पुगेको छ ।

सीडीएस एन्ड क्लियरिङ लिमिटेडका अनुसार सोमबारसम्म १४ करोड १९ लाख ९६ हजार ९२० कित्ताका लागि आवेदन परेको छ । कुल १४ अर्ब १९ करोड ९६ लाख ९२ हजार रुपैयाँ बराबरको आवेदन परेको हो । कम्पनीले माघ २ गतेदेखि सर्वसाधारणका लागि ७ करोड ५८ लाख ४० हजार कित्ता आइपीओ खुला गरेको हो । यसआधारमा, सर्वसाधारणले मागभन्दा १.८७ गुणा बढी आवेदन दिएका हुन् ।

कम्पनीले कुल ८ करोड कित्ता सेयरमध्ये ०.२० प्रतिशत अर्थात १ लाख ६० हजार कित्ता सेयर कर्मचारीहरुका लागि र ५५ ले हुने ४० लाख कित्ता सेयर सामूहिक लगानी कोषलाई छुट्याएर बाँकी सेयर सर्वसाधारणमा जारी गरेको हो ।

यसमा बिक्री प्रबन्धकको काम एनआइबीएल एस क्यापिटलले गरेको छ । लगानीकर्ताहरुले आस्वा सदस्य बैंक तथा वित्तीय संस्थाहरु र तिनका शाखा कार्यालयबाट आवेदन दिन सकिनेछ ।