इन्फ्रास्टक्चर बैंककाे आईपीओ १५ लाख बढिले भरे

६ माघ, काठमाडौं । नेपाल इन्फ्रास्टक्चर बैंक (निफ्रा)ले गत शुक्रबारबाट खुलाएको साधारण शेयरको आईपीओमा कम्पनीले माग गरेको भन्दा झन्डै साढे दुई गुणा बढी शेयरका लागि आवेदन परेको छ ।

शेयरको आवेदन खुला गरिएको माघ २ देखि ६ सम्मको पाँच दिनमा १५ लाखभन्दा धेरै आवेदन परेको कम्पनीको शेयर बिक्री प्रबन्धक एनआईबीएल एस क्यापिटलले जनाएको हो ।

क्यापिटलका अनुसार आईपीओमा करिब १८ अर्ब रुपैयाँ बराबरको शेयरका लागि आवेदन परेको छ । उक्त रकम अहिलेसम्मको सबैभन्दा ठूलो रकमको आवेदन हो ।

‘अहिले सीडीएससीको सिस्टम डाउन भएर यकिन विवरण हेर्न सकिएको छैन । क्यापितलले भन्यो, ‘तर, आवेदन १५ लाखभन्दा धेरै परेको छ । रकम १८ अर्ब हाराहारी छ ।’

यसअघि सबैभन्दा बढी चन्द्रागिरि हिल्सको आईपीओमा २ अर्ब ४४ करोड ७४ लाख ५३ हजार रुपैयाँ बराबरको २ करोड ४४ लाख ७४ हजार ५३० कित्ता शेयरका लागि १२ लाख ५१ हजार आवेदन परेको थियो । त्यसअघि प्रभु लाइफ इन्स्योरेन्सको प्राथमिक शेयर निष्काशनमा पनि करिब साढे १० लाख आवेदन परेको थियो ।

साधारण शेयरमा लगानी गर्नेहरू १० कित्ता पर्दा पनि भाग्योदय चिठ्ठा मानिरहेका बेला निफ्राले आठ करोड कित्ताको आईपीओ ल्याएको थियो।