पौडेलको नेतृत्वमा महासंघमा पूँजीबजार फोरमको गठन

९ माघ, काठमाडौं । नेपाल उद्योग वाणिज्य महासंघमा पहिलो पटक पूँजीबजारलाई समेट्दै गठन गरिएको फोरमको १४ सदस्यीय कार्यसमिति आज शुक्रबार चयन हुने भएको छ । नेपाल उद्योग वाणिज्य महासंघमा एक कार्यक्रमका बीच शुक्रबार संयोजकसहित १४ सदस्यीय कार्यसमिति चयन हुने भएको हो ।

यसअघि नै फोरमको संयोजकको जिम्मेवारी नेपाल इन्भेष्टर्स फोरमका निवर्तमान अध्यक्ष एवं सक्रिय लगानीकर्ता अम्बिकाप्रसाद पौडेलले पाइसकेका छन् । महासंघको सदस्यमा लोकप्रिय मत ल्याएर निर्वाचित भएका पौडेलको पहलमा पहिलो पटक महासंघमा यस्तो फोरम गठन भएको हो ।

शुक्रबार कार्यसमितिका बाँकी १३ जनाको नाम सार्वजनिक गर्ने तथा पदभार ग्रहण गर्ने कार्यक्रम रहेको बताइएको छ । पूँजीबजारको विकास र बिस्तारका लागि सक्रिय रुपमा काम गर्ने किसिमले फोरमको संरचना बिस्तार गर्ने प्रतिबद्धता यसअघि पौडेलले जनाएका थिए ।

बजार सुधारका लागि आवश्यक नीति निर्माणका लागि सम्बद्ध पक्षसँगको सहकार्यलाई फोरमले केन्द्रमा राखेर अघि बढ्ने फोरम संयोजक पौडेलको भनाई छ ।