नेम्बाङको स्मृतिमा साहित्यकार डा.गोविन्द भट्टराईलाई सम्मान गरिने

११ माघ, पाँचथर । राजनीतिज्ञ तथा साहित्यकार एवं फाल्गुनन्द गाँउपालिकाका निवर्तमान अध्यक्ष स्व. अमरकुमार नेम्बाङको नाममा स्थापित श्रष्टा सम्मान पुरूस्कार यसबर्ष वरिष्ठ समालोचक तथा साहित्यकार डा. गोविन्दराज भट्टराइलाई प्रदान गरिने भएको छ ।

अघिल्लो वर्षबाटै अमर नेम्बाङ लिम्बु स्मृति ट्रष्टको स्थापना गरि वितरण शुरू गरिएको उक्त साहित्य पुरस्कार एकलाख धनराशीको छ । तर यसबर्ष उक्त पुरस्कार मध्ये पचास हजार श्रष्टालाई वितरण गरिने छ ।

बॅाकी पचास हजार विश्वलाई नै स्तब्ध बनाएको सरूवा रोग कोरोनाको महामारीबाट समुदायलाई जोगाउनका निमित्त ट्रष्टमार्फत पाँचथरका ८ वटै पालिकाहरूमा वितरण गरिने स्वास्थ्य सामग्री खरिदको राशीमा थपिने ट्रष्टका अध्यक्ष मुनिन्द्र नेम्बाङले जानकारी दिएका छन् ।

नेम्बाङको नाममा स्थापित ट्रष्टले गत वर्षदेखि नै साहित्यसँगै सामाजिक, शैक्षिक र खेल क्षेत्रमा योगदान पुर्याएका व्यक्तित्वहरूलाई कदर गर्दै, सम्मानस्वरूप पुरस्कार वितरण गर्नुका साथै समाजिक क्षेत्रमा सेवाको कार्य गर्न पनि थालिसकेको छ ।

स्वर्गीय अमर नेम्बाङ लिम्बुको स्मृतिसभा यसपटक सदा झैं यही माघ महिनाको २६ गते पाँचथर जिल्लाको सदरमुकाम फिदिममा गरिने भएको छ ।