राष्ट्रिय वाणिज्य बैंकको नाफा ४६ करोडले घट्यो

१६ माघ, काठमाडौं । यतिबेला बैंकहरुले दोस्रो त्रैमासको वित्तीय विवरण सार्वजनिक गरिरहेका छन् । जसमध्ये शुक्रबार सरकारी स्वामित्वको राष्ट्रिय वाणिज्य बैंकले रिपोर्ट सार्वजनिक गरेको हो ।

पुष मसान्तसम्ममा राष्ट्रिय वाणिज्य बैंकको वित्तीय विरण हेर्दा नाफा घटेको छ । बैंकको नाफा २१ प्रतिशतले घटेको छ । बैंकले सार्वजनिक गरेको दोस्रो त्रैमासको अपरिष्कृत वित्तीय विवरण अनुसार बैंकले चालू आवको दोस्रो त्रैमाससम्ममा बैंकले १ अर्ब ७४ करोड ८८ करोड ५९ लाख रुपैयाँ मुनाफा आर्जन गरेको छ ।अघिल्लो बर्ष बैंकले २ अर्ब २० करोड ९४ लाख ८२ हजार रुपैयाँ मुनाफा गरेकोमा यो वर्ष बैंकको नाफा ४६ करोडले घटेको हो ।

पुष मसान्तसम्ममा बैंकले २ खर्ब ४१ अर्ब ४९ करोड ६८ लाख रुपैयाँ निक्षेप संकलन गरी १ खर्ब ६२ अर्ब ६८ करोड ७५ लाख रुपैयाँ कर्जा लगानी गरेको छ ।

त्यसैगरी, बैंकको सञ्चालन मुनाफा समीक्षा अवधिमा ६४ करोड ९८ लाख रुपैयाँ घटेर २ अर्ब ४१ करोड ५६ रुपैयाँमा सीमित भएको छ ।

पुष मसान्तसम्म बैंकको वितरण योग्य मुनाफा १ अर्ब ८० करोड ४४ लाख ६७ हजार रुपैयाँ रहेको छ ।चुक्ता पूँजी ९ अर्ब ४७ लाख ९५ हजार ७०० रुपैयाँ रहेको यस बैंकको प्रतिशेयर आम्दानी नाफा घटेसँगै १०.२३ रुपैयाँले घटेर ३८.८४ रुपैयाँ कायम भएको छ । बैंकको जगेडा कोषमा १३ अर्ब ८९ करोड ६२ लाख रुपैयाँ र शेयरधनी कोषमा २ अर्ब ६० करोड ६२ लाख रुपैयाँ रहेको छ ।