धितोपत्र बोर्डले भन्यो– ‘अग्रिम भुक्तानी नलिई शेयर खरिद गरे कारवाही हुन्छ’

१६ माघ, काठमाडौं । नेपाल धितोपत्र बोर्डले ब्रोकर कम्पनीहरूलाई २५ प्रतिशत रकम लिएर मात्रै शेयर खरिद गर्न निर्देशन दिएको छ । यो प्रावधान पहिलेदेखि नै थियो तर पूर्ण रुपमा कार्यान्वयन हुन सकेको थिएन ।

बिहीबार नेपाल धितोपत्र बोर्डले ब्रोकर कम्पनीलाई पूर्णरुपमा कार्यान्वयनको गर्न निर्देशन दिएको छ । यतिबेला ब्रोकर कार्यालयले पहुँच र अर्डरको भरमा बिना अग्रिम भुक्तानी क्लाइन्टलाई शेयर इडीआईएस गरिरहेका छन् ।

जसले गर्दा ब्रोकरहरुको मनोपलि बढेकाे लगानीकर्ताको गुनासो छ । । पहुँच भएका र आसेपासेले मात्र राम्रो कम्पनीको शेयरमा पंकड जमाइरहेको लगानीकर्ता बताउछन । यसले गर्दा बजारमा जोखिम बढ्ने भन्दै बोर्डले यस्तो निर्देशन दिएको हो । बजारलाई स्वच्छ प्रतिस्प्रर्धात्मक बनाउने उद्देश्यले बोर्डले ब्रोकर कार्यालयलाई यस्तो निर्देशन दिएको जनाएकाे छ ।

माघ ११ गतेबाट टि प्लस टू लागू भएको छ । टि प्लस टू लागूभएसँगै लगानीकर्ताले बिक्री गरेको शेयर टि प्लस वान दिनभित्र इडीआईएस गरिसक्नुपर्ने हुन्छ यदि ढिलो भयो भने २० प्रतिशत जरिवाना लाग्ने प्रावधान छ । तर, ब्रोकर कार्यालयले लगानीकर्ताले खरिद गरेको शेयर समयमा डिम्याटमा नपठाएको गुनासो आइरहेका छन् ।

जसले गर्दा आगामी दिनमा जोखिम नबढोस भन्ने उद्देश्यका साथ बोर्डले ५० वटै ब्रोकर कम्पनीहरूलाई लगानीकर्ताहरूबाट अग्रिम रुपमा २५ प्रतिशत रकम लिएर मात्रै शेयर किन्न निर्देशन दिएको छ ।

बोर्डका अनुसार अब उपरान्त अग्रिम रकम नलिई कारोबार गर्नेलाई भने अब छुट हुने छैन । त्यसरी रकम नलिई कारोबार गरेको फेला परे नियम अनुसार कारबाही अघि बढाउने बोर्डले जनाएको छ ।