२५१९ पुगेर ‘रेकर्ड ब्रेक’ गरेकै दिन नेप्से किन भयो राताे ?

२१ माघ, काठमाडौं । आज शेयरबजार खुलेको १५ मिनेट भित्र नै नेपाल स्टक एक्सचेन्ज (नेप्से)ले ‘रेकर्ड ब्रेक’ गरेको थियो । आज नेप्से २५१९ को उच्च स्कोर भेटेर हिजोको अन्तिम कारोबारमा ६ अंकले गिरावट आउँदै २४६६ बिन्दूमा बन्द भएको छ ।

आज कुल २०२ कम्पनीको २ करोड २० लाख ४० हजार कित्ता शेयर कुल ९ अर्ब ५३ करोड १७ लाख रुपैयाँमा खरिद बिक्री भएको छ । आजको कारोबारले बजार पुँजीकरण ३३ खर्ब २२ अर्ब रुपैयाँ पुगेको छ ।

आज १२ उपसुचक मध्ये ४ वटामा मात्रै वृद्धि देखिएको छ भने बाँकी ८ उपसुचक ऋणात्मक भएका छन् । वाणिज्य बैंक, हाइड्रोपावर, लघुवित्त र मिच्युअल फण्ड बाहेक सबै सुचकहरु नकारात्मक देखिए । सबै भन्दा धेरै जीवन बीमा समुहमा १९७ अंकको गिरावट देखिएको छ भने विकास बैंकमा ११ अंकको गिरावट आएको छ ।

ग्लोबल आइएमई बैंक, नेपाल पुनर्विमा कम्पनी, अरुण कावेली पावर, नेपाल टेलिकम तथा नेपाल बैंकको शेयर उच्च कारोबार भएको छ । नेपाल लाइफ इन्स्योरेन्स, शिखर इन्स्योरेन्स, सेञ्चुरी कमर्सियल बैंक, प्रभु लाइफ इन्स्योरेन् तथा एनसीसी बैंकको शेयर पनि आज उच्च कारोबार भएको छ । निरन्तर सर्किट लाग्दै एक हजार रुपैयाँ नाघेपछि मात्रै प्रभु लाइफको शेयर दोस्रो बजारमा विस्तारै किनबेच बढ्ने क्रममा देखिएको छ । नबिल बैंकसँग मर्ज हुने हल्लाका कारण एनसीसी र सेञ्चुरी बैंकको शेयरमा पनि लगानीकर्ताको आँखा परेको छ ।

राष्ट्र बैंकको नाम जोडेर बजारमा हल्ला फैलाएपछि घटेको लघुवित्तको शेयरमा भने आज सर्किट लागेको छ । घटेको शेयर मुल्यमा शेयर किन्ने लगानीकर्ताको चापका कारण माहुलि लघुवित्त, सामुदायिक लघुवित्त, उन्नति सहकार्य र जनउत्थानको शेयरमा सर्किट लागेको हो । त्यसैगरी अरुण काबेली, आईएमई जनरल, सर्पाेट माइक्राेफाइनान्स, जनरल इन्स्योरेन्स, सानिमा माइ हाइड्रो, ग्लोबल आइएमई बैंकका लगानीकर्ताले कमाएका छन् ।

आज पोखरा फाइनान्सका लगानीकर्ताले (२३ अंक) झण्डै ८ प्रतिशत गुमाएका छन् । त्यसैगरी नारायणी डेभलपमेन्ट बैंक, मल्टिपर्पस फाइनान्स, हिमालयन जनरल इन्स्योरेन्स, प्रोगेशिभ फाइनान्स, युनाइटेड मोदी हाइड्रोपावर, लक्ष्मी लघुवित्त, एनसीसी बैंक, सनराइज बैंक डिभेन्चर–८५, गुडविल फाइनान्सका लगानीकर्ताले गुमाएका छन् ।

किन एकाएक ब्याक ?

नेप्सेमा आजको उछाल पछिको गिरावटलाई धेरैले राजनीतिक उतारचढाव सँग जोडेका छन् । केही लगानीकर्ताले भने आज टीएमएसमा आएको खराबीका कारण पनि बजारमा गिरावट आएको अनुमान लगाएका छन् । बजारमा दीर्घकालीन लगानी गर्ने र कुर्ने लगानीकर्ता भन्दा पनि अल्पकालीन लगानीकर्ताको बर्चस्व भएका कारण बजार छिट्टै बढ्ने र छिट्टै घट्ने भइरहेको बजार विश्लेषहरु बताउँछन् । आजको गिरावट अल्पकालीन लगानीकर्ताको कमजोर मानसिकताको उपज भएको बजार विश्लेषकहरूको तर्क छ ।

देशकाे राजनीति र पुँजी बजार एक अर्काका परिपुरक झैं देखिन पुगेकाे छ । देशमा राजनीतिक स्थिरता हुँदा पुँजी बजारमा ढुक्कसँग लगानी गर्ने वातावरण बन्छ । तर देशमा राजनीतिक अस्थिरता बढ्दै जाँदा लगानीकर्ता लामाे समयसम्म पुँजी बरामा लगानी गर्न तयार हुँदैनन् जसकाे असर तत्कालै देखिन्छ । यस्ताे परिस्थतीमा दीर्घकालिन साेचका साथ लगानी गर्नेहरू भने धैर्य गरेर बस्नु नै उचित हुने बजार विश्लेषाकहरू बताउँछन् ।