सञ्चालकहरुसँग विवाद बढ्दै गएपछि सनराइज बैंकका सीईओले दिए राजीनामा

२७ माघ, काठमाडौं । सञ्चालकहरुबीच लगातारको विवादपछि सनराइज बैंकका प्रमुख कार्यकारी अधिकृत (सीईओ) बाट जनक शर्मा पौड्यालले राजीनामा दिएका छन् । उनलाई २०७६ असार २९ गते बैंकले प्रमुख कार्यकारी बनाएको थियो ।

सीईओ नियुक्ति कै विषयमा शुरुदेखि नै सञ्चालक समितिमा विवाद परेको थियो । त्यो विवाद बढदै राष्ट्र बैंकसमक्ष पनि पुगेको थियो । विवाद साम्य हुनुको साटो झन् बढदै गएपछि उनले राजीनामा दिएको बताइएको छ ।

सीईओ भएको केही समयपछि देखिनै बैंकका केही सञ्चालकहरुसँग उनको कुरा मिल्न छाडेको थियो । बैंकका अध्यक्ष मोतीलाल दुगड र अन्य सञ्चालकहरुबीचको विवादमा उनी अध्यक्षको पक्षमा देखिएपछि अन्य सञ्चालकहरु उनीसँग रुष्ट थिए ।

तर राजीनामा गर्नुअघि उनले सोमबार मात्रै नायव प्रमुख कार्यकारी अधिकृतमा आरती राणालाई बढुवा गरेका थिए । ग्लोबलमा सँगै काम गरेकी उनलाई सीईओ पौड्याल कै जोडबलमा सनराइज भित्र्याइएको थियो ।

करिब ३२ वर्ष बैंकिङ क्षेत्रमा बिताएका पौड्यालले नबिल बैंकबाट करियर सुरु गरेका थिए । उनले सन् १९८७ मा इन्ट्री लेभलबाट करियर सुरु गरेका हुन् । नबिलमा ११ वर्ष काम गरेपछि उनी एनआईसी बैंकमा पनि काम गरेका थिए ।

एनआईसी बैंकको स्थापनामा सक्रिय भूमिका खेलेका पौड्यालले पाँच वर्ष काम गरेपछि फेरि लक्ष्मी बैंक स्थापनाको प्रक्रिया थाल्न त्यता गए । लक्ष्मी बैंकमा एक वर्ष काम गरेपछि उनी अध्ययनका लागि लन्डन गएर साढे चार बर्ष त्यहाँको बैंकमा पनि काम गरेका थिए ।

त्यसपछि उनी ग्लोबल आईएमई बैंकमा सहायक महाप्रबन्धकका रूपमा भित्रिएका थिए । ग्लोबलको नायव प्रमुख कार्यकारी हुँदै उनी प्रमुख कार्यकारी अधिकृत बनेका थिए । ग्लोबल आईएमई बैंकमा पनि अध्यक्ष चन्द्र ढकालसँग विवाद बढेपछि दुई वर्ष कार्यकाल बाँकी छँदै राजीनामा दिएर उनी बाहिरिएका थिए ।

२ वर्ष कार्यकाल अझै बाँकी रहेका कारण उनले बाँकी समयको सेवा सुविधा समेत पाउने गरी राजीनामा दिएका हुन् ।