पाँच अर्बको आईपीओ आउँदै, कुन कम्पनीको कति कित्ता ?

५ फागुन, काठमाडौं । नेपाल धितोपत्र बोर्डमा आईपीओ निष्कासनको अनुमति माग्दै १२ कम्पनीले आवेदन दिएका छन् । उक्त १२ कम्पनीले ४ अर्ब ९२ करोड ७० लाख ४४ हजार ५ सय रुपैयाँ बराबरको ४ करोड कित्ता आइपीओ निष्कासन अनुमति मागेका हुन् ।

यी सबै कम्पनीको आइपीओलाई बोर्डले अनुमति दिएमा बजारमा कुल ४ करोड ९२ लाख ७० हजार ४४५ कित्ता सेयर सर्वसाधारणलाई जारी हुनेछ । धितोपत्र बोर्डमा आइपीओ निष्कासनका लागि अनुमति माग्नेमा अधिकांश कम्पनीहरु जलविद्युत समूहका रहेका छन् ।

अनुमतिको पाइपलाइनमा रहेका मध्ये ९ वटा जलविद्युत रहेका छन् । त्यस्तै, एउटा जीवन बिमा कम्पनी, अर्को डिस मिडिया नेटवर्क र क्याविटल कम्पनी रहेको छ । यतिबेला दोस्रो बजार वृद्धि भइरहेकाले प्राथमिक बजारमा पनि निकै आकर्षण छ ।

प्राथमिक बजारबाट दोस्रो बजार प्रवेश गर्ने लगानीकर्ताहरुको संख्या पनि वृद्धि भइरहेको छ । धितोपत्र बोर्डमा आइपीओ अनुमति माग्ने अधिकांश कम्पनीले आफ्नो वार्षिक साधारण सभामार्फत आइपीओ निकाष्सन गर्ने पस्ताव पारित गरिसकेका छन् ।

प्राथमिक बजारमा आइपीओ जारी भएपछि शेयर कारोबारका लागि नेप्से तथा सीडीएसमा सूचीकरण गर्नुपर्छ । यसर्थ, आइपीओले पुँजी बजारको दायरा थप फराकिलो पार्ने गर्छ ।

पछिल्लो समय सर्वसाधारणमा आइपीओ आकर्षण अत्याधिक देखिएको छ । फेस भ्यालुमा लगानी गर्न पाइने भएकाले नयाँ लगानीकर्ताको आगमन पनि बढ्दो क्रममा छ ।

आईपीओ निष्कासनको अनुमति मागेका ३ कम्पनीको आवेदन अनुमति रद्द

नेपाल धितोपत्र बोर्डमा आइपीओ जारी गर्न अनुमति माग्ने ३ कम्पनीको भने आवेदन रद्द गरिएको छ । विगत ६ महिनादेखि आवेदन अनुमति स्वीकृतका लागि थप कागजपत्रहरु माग गर्दा उपलब्ध नगराउने ३ कम्पनीको आइपीओ अनुमति रद्द गरिएको बोर्डको भनाई छ । आइपीओ निष्कासन अनुमति रद्द हुनेमा तेह्रथुम पावर कम्पनी, शुभम् पावर र इमर्जिङ नेपाल रहेका छन् ।