स्वार्थ बोकेका व्यक्तिहरुले धरहरा पुनर्निर्माणमा अवरोध पुर्‍याउन खोजे: मेयर शाक्य

२५ फागुन, काठमाडौं । काठमाडौं महानगरपालिकाका प्रमुख विद्यासुन्दर शाक्यले ऐतिहासिक महत्वको धरहरा पुनर्निर्माणमा स्वार्थ बोकेका व्यक्तिहरुले अवरोध पुर्‍याउन खोजेको बताएका छन् । खिचापोखरी न्यूरोड व्यापार संघको ७ औं अधिवेशन तथा १३ औ साधारणसभाको उद्घाटन कार्यक्रमलाई सम्बोधन गर्दै शाक्यले निहित स्वार्थ बोकेका केही व्यक्तिहरुले विभिन्न बहानामा धरहरा निर्माणको काममा अवरोध पुर्‍याउन खोजेको बताएका हुन् ।

उनले धरहरा निर्माण सम्पन्न भएपछि त्यस क्षेत्रका बासिन्दा र व्यवसायीलाई दुवैलाई फाइदा हुने बताएका छन् । त्यस्तै फाइदा हुने दुवै पक्षले एकअर्काप्रति सकारात्मक दृष्टिकोण राख्नुपर्ने शाक्यको भनाइ थियो । धरहरा बनाउने क्रममा सबैभन्दा बढी गाली आफूले खाएको भन्दै उनले महानगर एकाध समूहको विरोध र नाराबाजीमा नअल्झिने बताए ।

‘शाक्यले एकले अर्कोलाई दोषारोपण गरेर नभई सबैले आआफ्नै स्थानबाट जिम्मेवार रहेर दायित्वबोध गर्न पनि आग्रह गरे । त्यस्तै धरहरा पुनर्निर्माणमा बनाउन सबैले सहयोग गर्नुपर्ने आवश्यकता रहेको पनि उनले बताएका छन् ।