प्रदेश १ को हिउँदे अधिवेशन कार्यसूचीमा प्रवेशै नगरी अन्त्य

५ वैशाख,विराटनगर । प्रदेश नं १ को प्रदेशसभाको हिउँदे तथा सातौँ अधिवेशन आजदेखि अन्त्य भएको छ । अधिवेशनको आठौँ बैठक पनि दैनिक कार्यसूचीमा प्रवेशै नगरी अन्त्य भएको सभामुख प्रदीपकुमार भण्डारीले घोषणा गरेका छन् ।

जारी अधिवेशनमा पहिलो पटक प्रदेशसभामा पुगेका मुख्यमन्त्री प्रतिपक्षी दलहरुले संसद अवरुद्ध गरेपछि बोल्न पाएनन् । मुख्यमन्त्रीले बोल्न समय नपाएपछि सभामुख प्रदीपकुमार भण्डारीले प्रदेश प्रमुखले पठाएको अधिवेशन अन्त्यको पत्र वाचन गरेका थिए भने कार्यसूचीमा प्रवेश नगरी अधिवेशन अन्त्य गरेका थिए ।

सत्ता पक्षको विवादका कारण प्रभावित बनेको प्रदेशसभाको हिउँदे अधिवेशन तीन महिना चल्दा जम्मा आठवटा बैठक बसेको छ । तर अधिवेशनमा एउटा पनि विधेयकमा छलफल हुन् सकेन् । प्रदेश सरकारले बैठक छलेरै अधिवेशनको अन्त्य गरेको र सरकार प्रदेशसभासँग डराएको प्रतिपक्षी दलका नेताहरु बताउछन् ।

आइतबार बसेको बैठकमा प्रतिपक्षले अवरुद्ध गरेपछि सभामुख प्रदीपकुमार भण्डारीले भने ‘तपाईंहरुको विषयलाई सम्बोधनका लागि मुख्यमन्त्री आफै बैठकमा उपस्थित हुनुभएको छ, बस्नुहोस् ।’ तर कांग्रेस प्रमुख सचेतक केदार कार्कीले सम्बोधन सुन्नका लागि नभई विकास बजेट सुनिश्चितताका लागि अवरुद्ध गरेको बताएपछि प्रदेशप्रमुखको पत्र बाचन गरेर सभामुखले अधिवेशन अन्त्यको घोषणा गरेका थिए ।

बैठक अन्त्य भएपछि आन्तरिक मामिला तथा कानूनमन्त्री हिक्मतकुमार कार्कीले सञ्चारकर्मीसँग सङ्क्षिप्त कुराकानी गर्दै प्रदेश सरकारले सदनलाई पुनः सञ्चालन गर्न प्रमुख प्रतिपक्ष नेपाली कांग्रेस, नेकपा (माओवादी केन्द्र) र जसपासँग छलफल गर्दा पनि बैठक पुनः सञ्चालन हुने सम्भावना नदेखिएकाले आजै प्रदेश सरकारको मन्त्रिपरिषद्बाट अधिवेशन अन्त्यका लागि प्रदेश प्रमुख कार्यालयमा पत्राचार गरिएको र सोही अनुसार अधिवेशन अन्त्य भएको प्रतिक्रिया दिएका छन् ।