अविश्वास प्रस्तावमा हस्ताक्षर गर्ने नै मन्त्रिमण्डलमा सामेल

६ वैशाख, काठमाडौं । लुम्बिनी प्रदेश सरकारलाई दिएको समर्थन फिर्ता गरी सरकारबाट बाहिरिएको नेकपा माओवादी केन्द्रलाई चक्मा दिने गरी मुख्यमन्त्री शंकर पोखरेलले मन्त्रिमण्डल पुनर्गठन गरेका छन् ।

सरकारविरुद्ध नेपाली कांग्रेस, नेकपा माओवादी र जनता समाजवादी पार्टीले आजै अविश्वास दर्ता गराएका छन् । लगत्तै माओवादीका तर्फबाट मन्त्री रहेका कुलप्रसाद केसी र सुदर्शन बरालले राजीनामा गरेका थिए । तर जसपाका तर्फबाट अविश्वास प्रस्तावमा हस्ताक्षर गर्ने तीन सहित चार जनालाई पोखरेलले मन्त्रिमण्डलमा सामेल गर्ने भएका छन् । उनीहरुलाई आजै अपरान्ह् ४ बजे सपथ गराउने तयारी भइसकेको स्रोतले बतायो ।

आज मन्त्रिमण्डलमा सहभागी हुन लागेकाहरुमा विजय यादव,सन्तोष पाण्डे, कल्पना पाण्डे र सुमन रायमाझी रहने छन् । यीमध्ये कल्पना बाहेक तीनै जनाले अविश्वास प्रस्तावमा हस्ताक्षर गरेका थिए । उनीहरु सबै पूर्व राष्ट्रिय जनता पार्टीका तर्फबाट प्रतिनिधित्व गर्नहरु हुन् ।