संसदलाई छल्दै राष्ट्रपतिद्धारा ७ वटा अध्यादेश जारी

२१ बैशाख, काठमाडौं । यही बैशाख २७ गते संसद अधिवेशन आव्हान जारी गरेको सरकारले सदनलाई छल्दै हतारहतार ७ वटा विवादास्पद अध्यादेश जारी गरेको छ । जसमा पछिल्लो समय सबैभन्दा विवादमा परेको संवैधानिक परिषदसम्बन्धी अध्यादेश पनि छ ।

मंगलबार प्रधानमन्त्री केपी ओलीको सिफारिसमा राष्ट्रपति विद्यादेवी भण्डारीले संवैधानिक परिषद (काम कर्तव्‍य, अधिकार र कार्यविधि) सम्बन्धी (पहिलो संशोधन) अध्‍यादेश, २०७८ सहितका ७ वटा अध्यादेश जारी गरेकी हुन् । ती अध्यादेशमा के के बुदाँ उल्लेख छन् भन्ने नखुलाइएपनि हिजो बसेको मन्त्रिपरिषदको बैठकले अध्यादेश जारी गर्न राष्ट्रपति समक्ष सिफारिस गरेको थियो ।

यसअघि सरकारले गत मंसिरमा संवैधानिक परिषदसम्बन्धी अध्यादेश ल्याई अख्तियार दुरुपयोग अनुसन्धान आयोग, निर्वाचन आयोग, राष्ट्रिय मानव अधिकार आयोगसहित विभिन्न संवैधानिक आयोगमा पदाधिकारी नियुक्त गरेको थियो ।

नेपालको संविधानको धारा ११४ को उपधारा (१) बमोजिम अध्यादेशहरू जारी भएको राष्ट्रपति कार्यालयका सहायक प्रवक्ता केशवप्रसाद घिमिरेले जानकारी दिएका छन् ।