लुम्बिनीका कोभिड अस्पताल बिरामीले भरिए

२२ वैशाख,रुपन्देही । कोरोना भाइरस संक्रमण बढ्दै गएपछि जिल्लाका सरकारी अस्पताल बिरामीले भरिएका छन् । बुटवलस्थित लुम्बिनी प्रादेशिक अस्पताल र कोरोना विशेष अस्पताल तथा भैरहवाको भीम अस्पतालका शय्या भरिएपछि बिरामीलाई उपचारमा कठिनाइ भएको छ ।

अस्पतालमा शय्या अभाव भएपछि लुम्बिनी प्रादेशिक अस्पतालको फिभर क्लिनिकमै आज चार जनाले ज्यान गुमाए । क्लिनिकमा उपचाररत तीन महिला र एक पुरुष संक्रमितको मृत्यु भएको अस्पतालका सूचना अधिकारी डा विष्णु गौतमले जानकारी दिए । मृत्यु हुनेमा बुटवल उपमहानगरपालिका–१२ का ४७ वर्षीय पुरुष, कञ्चन गाउँपालिका–४ की २७ वर्षीया महिला, बुटवल–९ की ५४ वर्षीया महिला र तिलोत्तमा नगरपालिका–४ की ४० वर्षीया महिला छन् । अस्पतालका अनुसार कोरोना विशेष अस्थायी अस्पतालमा शय्या नपाएपछि उनीहरुलाई क्लिनिकमा नै उपचारका लागि राखिएको थियो ।

उता भीम अस्पतालस्थित कोरोना विशेष अस्पताल पनि बिरामीले भरिएको छ । कोभिडका लागि छुट्याइएका २७ शय्या भरिएपछि अस्पतालको आकस्मिक कक्षमा पनि सङ्क्रमितको उपचार भइरहेको छ । कोभिड कक्ष भरिएपछि आकस्मिक कक्षमा समेत संक्रमितको उपचार शुरु गरिएको अस्पतालका सूचना अधिकारी डा नारायण पोख्रेलले बताए । अक्सिजनसहितका शय्या खाली नभएपछि केही बिरामीलाई भुइँमा राखेर उपचार गर्न बाध्य भएको उनको भनाइ छ ।