गुराँस लाइफ इन्स्योरेन्सको मुनाफा साढे २४ प्रतिशतले बढ्यो, प्रतिशेयर आम्दानी कति ?

२९ वैशाख, काठमाडौं । चालू आर्थिक वर्षको तेस्रो त्रैमाससम्म गुराँस लाईफ इन्स्योरेन्सले १० करोड ४२ लाख ९३ हजार मुनाफा गरेको छ । गत वर्ष कम्पनीले ८ करोड ३७ लाख ६० हजार मुनाफा गरेको थियो । यस वर्ष गत वर्षको तुलनामा यस वर्ष कम्पनीले २४ दशमलव ५१ प्रतिशत बढी मुनाफा गरेको छ ।

तेस्रो त्रैमाससम्म कम्पनीले ३ अर्ब ४ करोड ९२ लाख ५४ हजार कुल बीमाशुल्क आर्जन गरेको छ । गत वर्षभन्दा यस वर्ष कम्पनीले १२२ दशमलव ६८ प्रतिशत बढी कुल बीमाशुल्क आर्जन गरेको हो । गत वर्ष यस अवधिसम्म कम्पनीले रू। १ अर्ब ३६ करोड ९३ लाख १५ हजार कुल बीमाशुल्क आर्जन गरेको थियो गत वर्षभन्दा यस वर्ष कम्पनीको कुल आम्दानी ४० प्रतिशत र कुल खर्च ८४ प्रतिशत बढी भएको छ । कम्पनीले यस वर्ष १५ करोड ८० लाख ६३ हजार कुल आम्दानी र ५ करोड ३७ लाख ७० हजार कुल खर्च गरेको हो ।

हकप्रद र बोनस शेयर मार्फत पूँजी वृद्धि गरी  १ अर्ब ९७ करोड ५५ लाख ८५ हजार कायम भएको छ । कम्पनीको जगेडा कोष रकम पनि गत वर्षभन्दा यस वर्ष ४२ दशमलव ७९ प्रतिशत बढी छ । गत वर्ष ३६ करोड ६३ लाख ४३ हजार रहेको जगेडा कोष रकम यस वर्ष ५२ करोड ३१ लाख १४ हजार पुगेको हो । बीमा कोष रकम पनि ४२ प्रतिशत बढी  १० अर्ब ११ करोड ९३ लाख ५७ हजार कायम भएको छ ।

कम्पनीले बीमालेख धितोमा ९७ करोड ६ लाख ५९ हजार प्रवाह गरेको छ । गत वर्षभन्दा यस वर्ष बीमालेख धितोकर्जा ९३ दशमलव ४६ प्रतिशत बढी प्रवाह भएको हो । वार्षिक प्रतिशेयर आम्दानी  ७ दशमलव शून्य ४ रहेको कम्पनीको प्रतिशेयर नेटवर्थ  १२९ दशमलव ३१ रहेको छ ।