जब प्रधानसेनापति बालुवाटार पुगे

६ जेठ, काठमाडौं । नेकपा एमालेको स्थायी कमिटी बैठक बसिरहेकै बेला प्रधानसेनापति पूर्णचन्द्र थापा प्रधानमन्त्री निवास बालुवाटार छिरे । स्थायी कमिटी बैठक छाडेर प्रधानमन्त्री ओली प्रधानसेनापति थापालाई भेट्न निस्किए ।

स्थायी कमिटी बैठकमा संसद्को आसन्न अधिवेशन, बजेट र बाग्मती प्रदेश अन्तर्गत राष्ट्रियसभाका लागि भइरहेको मतदानको विषयमा छलफल चल्दै थियो । प्रधानमन्त्री ओली अब संसद बोलाएर विश्वासको मत लिनुपर्ने र जस्तो निश्कर्ष आउँछ सोही बमोजिम रणनीति बनाउनुपर्ने भन्दै आफ्ना कुरा राख्दै थिए ।

आफ्ना सबै कुरा नटुंग्याउँदै ओलीले प्रधानसेनापतिलाई भेट गरेको बालुवाटार निकट स्रोतले बताएको छ । आज साँझ ओलीले मन्त्रिपरिषदको बैठक डाकेका छन् । सम्भवतः राष्ट्रिय सुरक्षाका विषयमा लिन लागिएको निर्णयबारे राय लिन प्रधानसेनापतिलाई बोलाइएको हुनसक्ने स्रोतले बताएको छ ।