संविधानमाथि जालसाजी गर्ने राष्ट्रपतिलाई तत्काल महाअभियोग लगाउँ – तरुण दल

७ जेठ, काठमाडौं । नेपाली कांग्रेसको युवा भातृ संगठन नेपाल तरुण दलले राष्ट्रपति बिद्यादेवीभण्डारीका गतिविधि संविधानमाथिको जालसाजी भएको बताएको छ । तरुण दलका अध्यक्ष जीतजङ्ग बस्नेतले एक विज्ञप्ति जारी गर्दै संविधानको धारा ७६ को ३ अनुसार नियुक्त प्रधानमन्त्रीले विश्वासको मत पनि नलिएको र राजीनामा समेत नदिएको अवस्थामा नयाँ सरकार गठनका लागि समय तोक्नु गलत एवम् संविधान माथिको जालसाजी भएको बताएको हो ।

‘संविधान विरुद्ध राष्ट्रपतिद्वारा फेरी घात भएको र यो संविधान विरुद्धको अपराध हो । देश र जनता कोरोना भाईरसको महामारीसँग लडिरहेका बेला राष्ट्रपतिबाट भएका यस्ता प्रकारका अव्यवहारिक, अमानवीय र संविधानको मर्म विपरितका गतिविधिहरु जालसाजीपुर्ण गतिविधि हुन । संविधानका प्रक्रियाहरु मुलुक संचालनका विधि र व्यवहार हुन । राष्ट्रपति र प्रधानमन्त्रीबाट भएका यस्ता प्रकारका घर व्यवहार संचालन जस्ता देखिने गतिविधिहरु खेदजनक छ ।’ बस्नेतले जारी गरेको विज्ञाप्तिमा भनिएको छ ।

संसदीय मुल्य मान्यता बोकेका मुलुकहरुले सबै समस्याको समाधान संसदबाट नै खोज्नु पर्छ भन्ने मान्यतामा नेपाल तरुण दल रहेको भन्दै राष्ट्रपतिको भुमिका सबै नागरिकको अभिभावक हुनुपर्नेमा प्रधानमन्त्रीको कारिन्दा र संविधानको भक्षक भएकाले राष्ट्रपतिलाई महाअभियोग प्रस्तावबाट पदबाट तत्काल हटाउन तरुण दलले माग गरेको छ ।