लघुवित्तले निषेधाज्ञा सकिएको ७ दिनसम्म ग्राहकबाट कुनै पनि पेनाल्टी लिन नपाउने

१२ जेठ, काठमाडौं । लघुवित्त कम्पनीहरुले कोभिड १९ संक्रमण न्यूनीकरणका लागि जारी भएको निषेधाज्ञा अवधिभर र सो अवधि सकिएको ७ दिनसम्म ग्राहकबाट कर्जा असुलीमा कुनै पनि पेनाल्टी लिन नपाउने भएका छन् ।

केन्द्रीय बैंकले लघुवित्त संस्थाहरुलाई जारी गरेको एकीकृत निर्देशन, २०७७ लाई संशोधन गर्दै ग्राहकबाट कर्जा असुलीमा कुनै पनि प्रकारको पेनाल्टी वा अतिरिक्त शुल्क लिन नपाउने व्यवस्था गरेको हो ।

केन्द्रीय बैंकले निषेधाज्ञा अवधिभर र सो अवधि समाप्त भएको एक महिनासम्म संस्थाले कुनै पनि प्रकारको असुलीसम्बन्धी सूचना वा लिलामीसम्बन्धी सूचना जारी नगर्न निर्देशन दिएको छ ।

साथै, लघुवित्त संस्थाले निषेधाज्ञाको अवधिमा कर्जाको किस्ता वा ब्याज भुक्तानी गरी विश्वासनीयता कायम गर्न सक्ने ग्राहकलाई प्रोत्साहनस्वरुप ब्याजदर वा ब्याज रकममा छुट प्रदान गर्न सक्ने जनाएको छ । निर्देशनमा भनिएको छ, ‘सञ्चालक समितिले यस्तो छुटसम्बन्धी व्यवस्थाको निर्णय गरी वेवसाइटमा सार्वजनिक गरी पारदर्शी ढंगले लागू गर्नुपर्नेछ ।’