असामान्य परिस्थितिका कारण देखाउँदै भन्सार एजेन्टको लिखित परीक्षा स्थगित

१३ जेठ,काठमाडौं । आगामी  जेठ २२ गतेका लागि तय गरिएको भन्सार एजेन्टको लिखित परीक्षा स्थगन भएको छ। भन्सार विभागले एक सूचना जारी गर्दै कोभिड–१९ सङ्क्रमणलाई ध्यानमा राख्दै देशका अधिकांश जिल्लामा लागू गरिएको निषेधाज्ञाका कारण लिखित परीक्षा स्थगन गरिएको जानकारी दिएको हाे ।

‘कोभिड–१९ बाट सिर्जित असमान्य परिस्थितिका कारण उक्त परीक्षा स्थगन गरी लिखित परीक्षा हुनुभन्दा कम्तीमा १५ दिनअगाडि सूचना प्रकाशन गरिनेछ। लिखित परीक्षासम्बन्धी सूचना गोरखापत्र र विभागको वेबसाइटमा समेत राखिनेछ’, विभागले सार्वजनिक गरिएको सूचनामा भनिएको छ।

गत चैत दोस्रो साता विभागले ६६० संख्यामा भन्सार एजेन्टको माग गरेको थियो।