आजदेखि विघटनविरुद्ध परेका सबै रिटको संवैधानिक इजलाशमा सुनुवाई हुने

१४ जेठ, काठमाडौं  । प्रतिनिधिसभा विघटनविरुद्ध परेका सबै रिटको आजदेखि संवैधानिक इजलाशमा सुनुवाई  हुने भएको छ । प्रधानन्यायाधीश चोलेन्द्रशमशेर जबराको एकल इजलाशले हिजो संवैधानिक इजलाशमा पठाएका १९ रिटका अतिरिक्त पहिले नै संवैधानिक इजलाशमा पठाइएका ११ रिट गरी संवैधानिक इजलाशमा आजदेखि ३० वा रिटमाथि सुनुवाई सुरु हुन लागेको हो ।

आज नै संवैधानिक इजलाश गठन गरेर ती रिटको सुनुवाइ सुरु हुने बताइएको छ । बिहीबार रिट निवेदकतर्फका कानुन व्यवसायीले संसद विघटनसम्बन्धी मुद्धाको सुनुवाइका लागि ११ जनाभन्दा धेरै न्यायाधीशको बृहत पूर्ण इजलाश गठन गर्न माग गरेका थिए।

संवैधानिक इजलाशमा कांग्रेस सभापति शेरबहादुर देउवालाई प्रधानमन्त्री बनाउन  र प्रतिनिधिसभा विघटन गलत भएको भन्दै  दायर भएका २६ वटा र प्रधानमन्त्री ओलीलाई नै निरन्तरता दिनुपर्ने माग गर्दै दायर भएका ४ वटा रिट छन् ।