प्रहरी नै हिड्न थाले रक्सी चोरेर…., ३ प्रहरी निलम्बित

१७ जेठ, लाहान । निषेधाज्ञाका कारण सबैतिर बन्द गराउँदै शान्ति सुरक्षामा हिडेको नेपाल प्रहरीका जवानहरु आफैले रक्सी चोरेर हिडेपछि कारवाहीमा परेका छन् । लाहान बजारको एउटा मदिरा पसलबाट ४ बोतल भोड्का चोरेको आरोपमा ३ प्रहरी निलम्बनमा परेका छन् ।

जिल्ला प्रहरी कार्यालय सिरहाले प्रहरी सहायक निरीक्षक (असई) नवलकिशोर ठाकुर, प्रहरी जवान अन्नु कुमार राय र नरेश कुमार रायलाई निलम्बन गरेको हो । घटना सार्वजनिक भएपछि उनीहरुलाई प्रहरी नियमावली २०७१ बमोजिम निलम्बन गरी थप अनुसन्धान भईरहेको जिल्ला प्रहरी कार्यालय सिरहाले जनाएको छ ।

घटना अनुसार जेठ ९ गते राती इलाका प्रहरी कार्यालय लहानबाट सई नवल साहको नेतृत्वमा खटिएको प्रहरी टोलीले लहान १३ स्थित पञ्चु महतोको एसके मदिरा पसलबाट चार बोतल भोड्का चोरेर मस्त पिएको सीसीटिभी क्यामेरामा कैद भएको छ । यो घटना जेठ १० गते सीसीटिभीको रेकर्ड हेर्दा देखिएको हो ।

रेकर्ड हेर्ने एक व्यक्तिका अनुसार प्रहरी अनुराग रायले चोरेको चार बोतल भोड्का अन्य नौ जना प्रहरीसँगै मिलेर सितनसँग पिएको दृश्य कैद छ । सीसीटिभीको यस्तो दृश्य देखिएपछि व्यापारीहरुबीच हल्लीखली मच्चियो । सिरहाको लहान बजारमा चोरी डकैती रोक्न गस्तीमा हिंडेका प्रहरीले भोड्का चोरेको सार्वजनिक भएपछि लहानबासीहरु छक्क परेका छन ।

सो क्रममा पसलका सञ्चालक भागी पसल खाली रहेको अबस्थामा उनीहरुले भोड्का लिई गएको भिडियो विभिन्न सामाजिक सञ्जाल तथा संचारमाध्यमबाट सार्वजनिक भएका थिए । प्रहरीले सीसीटिभी क्यामराको भिडियो फुटेज कसैलाई नदिन र सार्वजनिक नगर्न दवावसमेत दिएको व्यापारीहरुले बताएका छन् । र, यो घटनालाई लुकाउनको निमित वडाध्यक्ष कन्हैया गुप्ताले पनि सिरहा प्रहरीलाई साथ दिइरहेको व्यापारीहरुले बताएका छन् ।

वडाध्यक्ष गुप्ताले सीसीटिभी क्यामराको फुटेज सार्वजनिक गरे नराम्रो हुने भन्दै होटलको बोर्डसमेत हटाउन लगाएका छन् । स्मरणीय छ, लहानमा विगत दुई महिनाको अवधिमा दुई दर्जन भन्दा बढी चोरी डकैतीका घटना भएका छन् भने एकजना सुनचाँदी व्यवसायीको हत्यासमेत भएको छ ।