जसपा अध्यक्ष ठाकुर र महतोसहित ४ नेतालाई कारवाही गरेको पत्र आयोगमा दर्ता

१८ जेठ, काठमाडौं ।  जनता समाजवादी पार्टी (जसपा) को उपेन्द्र यादव पक्षले पार्टी अध्यक्ष महन्थ ठाकुर र वरिष्ठ नेता राजेन्द्र महतोसहित ४ नेतालाई पार्टीबाट निष्कासन गरिएको जानकारी निर्वाचन आयोगलाई गराएको छ ।

यादव पक्षले  १७ जेठमा बसेको पार्टीको कार्यकारिणी समितिको बैठकले ठाकुर, महतोसहित नेता सर्वेन्द्रनाथ शुक्ल र लक्ष्मणलाल कर्णलाई पार्टीबाट निष्काशन गरेको पत्र निर्वाचन आयोगमा पठाएको हो ।

अध्यक्ष उपेन्द्र यादवले आयोगमा पठाएको पत्रमा उहाँहरुलाई पार्टी विधान र दल सम्बन्धी ऐन अनुसार पार्टीबाट निष्काशन गरिएकोले  नेताहरुको नाम दलको दर्ता किताबबाट हटाउन आग्रह गरिएको उल्लेख छ ।

पत्र आयोगमा दर्ता भएको र आवश्यक प्रक्रियाका अघि बढाउन एवम् अध्यानका लागि आयोगको कानून तथा राजनीति दल सम्वन्धी महाशाखा पठाइएको निर्वाचन आयोगले जनाएको छ ।