दल विभाजनका लागि अध्यादेश ल्याइदिन ओलीसँग ठाकुरको आग्रह

१९ जेठ, काठमाडौं । पार्टीभित्र उपेन्द्र यादव पक्ष बहुमतमा भएपछि र दल विभाजनका आवश्यक अंकगणित नपुग्दा जनता समाजवादी दलको महन्थ ठाकुर पक्षले प्रधानमन्त्री केपी ओलीसँग दल विभाजनका लागि सहयोगको अपील गरेको छ ।

दल विभाजन सम्वन्धि अध्यादेश ल्याइदिएर वा निर्वाचन आयोगमार्फत आफुहरुलाई दल विभाजनका लागि सहज पारिदिन आग्रह गर्दै त्यसपछि मात्र सरकारमा सहभागी हुन सहज हुने बचन ठाकुरले प्रधानमन्त्री ओलीलाई दिएका छन् ।

वर्तमान कानून अनुसार अहिले पार्टी विभाजनका लागि आवश्यक ४० प्रतिशत ठाकुर पक्षसँग छैन । अझ प्रतिनिधिसभा विघटन भएपछि त ठाकुर पक्ष झनै असजिलोमा परेको छ ।  ठाकुर पक्षीय केन्द्रीय कार्यकारिणी र संसदीय दल दुवै तिर आवश्यक प्रतिशत पुग्ने हैसियतमा छैन । राष्ट्रियसभामा तीन जना सांसद रहेका जसपा २ सांसद  यादव पक्षमा रहेका छन् । जसले गर्दा हाल संसदीय दलमा ठाकुर पक्षका ४० प्रतिशत पुग्ने अवस्था देखिदैन ।  यस्तै केन्द्रीय कार्यकारिणीमा ५१ मध्ये २० जना ठाकुर पक्षसँग छ ।

प्रतिनिधिसभामा बहुमत पुग्ने भए पनि विघटन भएका कारण त्यसले हाललाई त्यति ठूलो अर्थ राख्ने देखिँदैन । यो अंकगणितले समस्या दिएपछि  ठाकुर र महतोले पक्षले अध्यादेश ल्याएर वा निर्वाचन आयोगमार्फत पार्टी विभाजनका लागि सहज पारिदिन प्रधानमन्त्री ओलीलाई आग्रह गरेका हुन ।

यता प्रधानमन्त्री भने अध्यादेश ल्याउँदा माधव नेपाल पक्षलाई सहज हुने तत्काल अध्यादेश ल्याउने भन्दा पनि निर्वाचन आयोगबाट आवश्यक वातावरण बनाउने आश्वसन दिएको जसपा नेताहरुले बताएका छन् । जसपा भित्र दुवै पक्षले एकले अर्कोलाई कारवाही गरेको जानकारी निर्वाचन आयोगलाई दिएका छन् ।