मुख्यमन्त्रीमा भट्टको निरन्तरता, विश्वासको मतको पक्षमा स्पष्ट बहुमत

२५ जेठ,  काठमाडौं । आफुमाथि सदनको पूर्ण विश्वास छ भनि सुदूरपश्चिम प्रदेशका मुख्यमन्त्री त्रिलोचन भट्टले प्रदेशसभामा पेश गरेको विश्वासको मत सम्वन्धि प्रस्ताव बहुमतले पारित भएको छ ।

मुख्यमन्त्री भट्टले नेकपा एमालेको माधवकुमार नेपाल समूहका १८ जना प्रदेशसभा सदस्यको साथले उनले विश्वासको मत पाएका हुन् । ५२ सदस्यीय प्रदेशसभामा मुख्यमन्त्री भट्टलाई विश्वासको मतका लागि २७ मत चाहिएको थियो । उनले ३० मत पाए ।

विश्वासको पक्षमा ३० मत र विपक्षमा ९ भोटमात्रै खसेको थियो । नेकपा एमालेको ओली समूहका ७ जना र जनता समाजवादी पार्टीका दुईजना प्रदेश सभा सदस्ले विपक्षमा मतदान गरेका थिए ।

जम्मा ५२ सदस्य रहेको सुदूरपश्चिम प्रदेश सभाको बैठकमा ५१ जना सांसद उपस्थित भएका थिए । सुदूरपश्चिम प्रदेशमा नेकपा एमालेको सभामुखसहित २५ जना, माओवादी केन्द्रका १३ जना, नेपाली कांग्रेसका १२ जना र जनता समाजवादी पार्टीका २ जना प्रदेशसभा सदस्य छन् । एमालेका २५ मध्ये माधवकुमार नेपाल पक्षका १८ जना छन् ।

प्रदेशसभाको अर्को बैठक आज साँझ ४ बजेका लागि बोलाइएको छ ।आज बिहान बसेको एमाले संसदीय दलको बैठकले विश्वासको मतका लागि  पेश गरेको प्रस्तावमा मतदान गर्ने निर्णय गरेको थियो ।