गण्डकी प्रदेश सरकारको प्राथमिकतामा पूर्व मुख्यमन्त्रीलाई सेवा सुविधा ? [ भिडियाेसहित ]

३० जेठ, काठमाडौं । लामो रस्साकस्सीपछि फेरिएको गण्डकी प्रदेश सरकारको प्राथमिकता के होला ? हिजै मात्र मुख्यमन्त्री बनेका नेपाली कांग्रेस संसदीय दलका नेता कृष्णचन्द्र नेपाली भन्छन्– कोरोना नियन्त्रण ।

कोरोना नियन्त्रणको नारा यसअघिको पृथ्वी सुब्बा गुरुङ नेतृत्वको सरकारले पनि दिएको हो । तर नियन्त्रणका लागि ठोस काम गर्न सकेन । यद्यपि यो समस्या एउटा प्रदेश सरकारको एकल पहलले मात्र सम्भव पनि छैन ।

आज नयाँ मन्त्रिपरिषदको पहिलो बैठक बस्यो । निर्णय भने पूर्वमुख्यमन्त्रीहरुलाई सेवा सुविधा दिनेबारे गरियो । सरकारले गरेको यो निर्णयलाई पहिलो गाँसमै ढुँगो भने के होला ? भूतपूर्व मुख्यमन्त्रीको सेवासुविधा निर्धारण गरिनु गलत होइन । तर पहिलो क्याबिनेटले नै यस्तो निर्णय गर्नु कति जायज हो ? प्रश्न यो मात्रै हो ।

प्रदेश सरकारले असार १ गते प्रदेशसभामा वार्षिक बजेट पेश गर्नैपर्ने व्यबस्था छ । त्यसका लागि पनि नयाँ सरकारले ध्यान दिनुपर्ने हो ।किनभने अबको दुई दिनमै यो जिम्मेवारी सरकारले पूरा गर्नुपर्ने छ । अर्थ मन्त्रालयको जिम्मेवारी पनि अहिले मुख्यमन्त्री नेपालीकै जिम्मा छ । उनले नै प्रदेशसभामा बजेट भाषण गर्नुपर्ने अवस्था रहेको छ । पहिलो क्याबिनेट बैठकले यस्ता विषयमा ध्यान केन्द्रित गरेको भए राम्रो हुने थियो ।

राजमो सरकारमा नजाने

नयाँ सरकार बनाउन निर्णायक भूमिका खेलेको राष्ट्रिय जनमोर्चा नेपाल सत्तामा नजाने भएको छ । आज मात्रै पार्टी अध्यक्ष चित्रबहादुर केसीले विज्ञप्ति जारी गर्दै आफ्नो पार्टी सरकारमा नजाने प्रष्ट पारेका छन् । तर सरकारलाई समर्थन भने दिने उनको भनाई छ । सरकारले निकट भविष्यमा लिने विश्वासको मत दिने उनले जनाएका छन् ।

सरकारलाई सधैं समर्थन दिनेबारे भने राजमोले शर्त तेस्र्याएको छ । गुण र दोषका आधारमा सरकारलाई समर्थन वा विरोध गरिने छ – अध्यक्ष केसीले उल्लेख गरेका छन् । तर प्रतिगमनका मतियारहरुलाई भने सत्ताबाट बढारिएको भन्दै उनले प्रसन्नता प्रकट गरेका छन् ।