मेलम्चीमा फेरि बाढी, हेलम्बुको प्रहरी चौकी नै तहसनहस !

५ असार, सिन्धुपाल्चोक । सिन्धुपाल्चोकको मेलम्चीमा हिजो बेलुकी फेरि बाढी आएको छ । राती मेलम्ची खोलामा आएको बाढीले स्थानीय इलाका प्रहरी कार्यालय भवन नै बगाएको छ। हेलम्बु गाउँपालिका–२ को वडा कार्यालय‚ ईलाका प्रहरी कार्यालयको भवन र विद्यालयको भवन बाढीले बगाएको हो।

राति काठ, दाउरा, ठूला ढुङ्गा र लेदोसहित बाढी आएको बाढीले हेलम्बुको प्रहरी चौकी नै तहसनहस पारेको स्थानीय पत्रकार लक्ष्मण बिष्टले नेपालबहस डटकमलाई बताए ।

शुक्रबार साँझ पानी पर्न थालेपछि बाढी बढेको थियो । मंगलबार आएको बाढीले खासै क्षति नपुगेको इलाका प्रहरी कार्यालय हेलम्बुको कार्यालय शुक्रबारको बाढीले भने भत्काएको बिष्टले बताए ।

राति बस्तीमा पसेको बाढी मंगलबार जस्तो ठूलो नभएपनि बाढीले बगाएर ल्याएका ढुङ्गा, काठ र लेदो थप जम्मा भएको छ । अहिले भने बाढी घटेको र वर्षा पनि रोकिएको  छ ।

साे प्रहरी चौकी पाँच महिनाअघि मात्र निर्माण सकिएर उद्घाटन भएको थियो । भवन निर्माणका लागि प्रदेशको आन्तरिक मामिला तथा कानुन मन्त्रालयले ३ करोड १७ लाख ६९ हजार रुपैयाँ बजेट दिएको थियो । ‘क’ वर्गको यो इलाका प्रहरी कार्यालयमा प्रहरी निरीक्षकको कमाण्ड रहन्छ । यद्यपि हाल सईले कमाण्ड गरिररहेका थिए ।

असार १ गतेदेखि निरन्तर आइरहेको बाढीले जोखिममा रहेका ती कार्यालयका भवनहरू शुक्रबार राति बगाएको हो । त्यस्तै, वडा नम्बर ४ ग्याल्थुममा रहेको ईस्ट प्वाइन्ट एकेडेमीको भवन समेत बाढीले बगाएको बिष्टले बताए ।

हाल प्रहरी कार्यालय माथिल्लो भेगमा भाडाको घरमा सारिएको छ । मंगलवारदेखि आएको बाढीका कारण हेलम्बु गाउँपालिकादेखि मेलम्ची बजारमा ठुलो क्षति पुर्याएको छ ।