राप्रपामा ‘तीनघोडे रथ’को गतिहिनता अन्त्य गर्न भदौमा महाधिवेशन गरौंः कमल थापा

असार १३, काठमाडौं । राष्ट्रिय प्रजातन्त्र पार्टीका अध्यक्ष कमल थापाले राप्रपा महाधिवेशन आगामी भदौमा गरिसक्न प्रस्ताव गरेका छन् ।आज सामाजिक सञ्जाल ट्विटरमा एक ट्विट गर्दै अध्यक्ष थापाले हिन्दुराष्ट्र र राजसंस्थाको पक्षमा सशक्त भुमिका खेली राप्रपालाई मुलुकको अग्रणी शक्ति बनाउन र आगामी निर्वाचनको तयारीको लागि राप्रपा महाधिवेशन अत्यावश्यक भएको बताउँदै भदौ भित्रै महाधिवेशन गर्नुपर्ने धारणा व्यक्त गरेका हुन्।

उनले लेखेका छन्, “हिन्दुराष्ट्र र राजसंस्थाको पक्षमा माहौल तातेको बेला सशक्त भूमिका खेल्न, राप्रपालाई अग्रणी शक्ति बनाउन, फागुनमा हुने स्थानीय चुनावको तयारी गर्न, ‘तीनघोडे रथ’ को गतिहिनता अन्त्य गर्न र पार्टी एकता गर्दाको सम्झौता पालना गर्न आगामी भदौमा पार्टी महाधिवेशन हुनुपर्छ भन्ने मेरो स्पष्ट धारणा छ।”

राप्रपाले यस अघि जेठका लागि घोषणा गरेको महाधिवेशन कोभिडका कारण रोकिएको थियो । राप्रपामा हाल तीन अध्यक्ष रहेका कारण पार्टी निष्क्रिय रहेको बताउँदै एकल नेतृत्वको लागि पार्टी एकता गर्दाको सम्झौता अनुसार तत्काल महाधिवेशन गर्न राप्रपाका विभिन्न बैठकहरुमा अध्यक्ष कमल थापाले माग गर्दै आएका छन् ।

राप्रपा अर्का दुई अध्यक्ष पशुपतिशमशेर जबरा र डा. प्रकाशचन्द्र लोहनीले भने महाधिवेशनबारे आफ्ना धारणा सार्वजनिक गरिसकेका छैनन् ।