शुक्रबारदेखि सबै सार्वजनिक सवारी चलाउने यातायात व्यवसायीको तयारी

१६ असार, काठमाडाैं । नेपाल यातायात व्यवसायी र यातायात मजदुर संगठनहरूले शुक्रबारदेखि देशभरका सार्वजनिक सवारीसाधन चलाउने तयारी गरेका छन् । उनीहरूले देशभरका मजदुर र व्यवसायीलाई सवारी चलाउनका लागि सार्वजनिक आह्वान गरेका छन् ।

नेपाल यातायात स्वतन्त्र मजदुर संगठनका अध्यक्ष भीमज्वाला राईले असार १८ देखि देशभर चल्ने छोटो, मध्यम र लामो दूरीका सवारीसाधन चलाउने तयारी गरेको बताए । यातायात व्यवस्था विभागका महानिर्देशक नमराज घिमिरेले भने सार्वजनिक यातायात खुलाउने विषयमा विभागको कुनै भूमिका नहुने बताए ।

काठमाडौं जिल्ला प्रशासनले मंगलबार यातायात व्यवसायी र मजदुर संगठनका पदाधिकारीलाई बोलाएर कोभिडको प्रभावलाई हेरेर सरकारले निर्णय नगर्दासम्म सार्वजनिक यातायातका सवारीसाधन नचलाउने आग्रह गरेको छ ।

प्रमुख जिल्ला अधिकारी कालीप्रसाद पराजुलीले सरोकारवाला सबै निकायको बिहीबार बैठक डाकेका छन् । सबै पक्षको सहमतिमा स्वास्थ्य मापदण्ड बनाएर खुलाउन तयार रहेको प्रशासनको भनाइ छ ।

यसअघि सोमबार उपत्यकाका तीन जिल्लाका प्रमुख जिल्ला अधिकारीहरूको बैठकले काठमाडौं उपत्यकामा मंगलबारदेखि २५ सिटभन्दा बढीका सार्वजनिक सवारीसाधन जोर–बिजोरका आधारमा चल्न पाउने निर्णय गरेको थियो । काठमाडौं, ललितपुर र भक्तपुरका प्रमुख जिल्ला अधिकारीहरूको संयुक्त बैठकले यो निर्णय गरेको थियो ।