सेञ्चुरी बैंकमा विवाद, सीईओ गौतमले किन दिए राजीनामा ?

२१ असार, काठमाडौं । सेञ्चुरी कर्मशियल बैंकका प्रमुख कार्यकारी अधिकृत (सीईओ) तुलसीराम गौतमले अकस्मात राजीनामा दिएका छन् । चार बर्षका लागि सीईओमा नियूक्त भएका गौतमले कार्यकाल सकिन नौ महिना बाँकी छँदै आइतबार साँझ बैंक सञ्चालक समितिलाई राजीनामा बुझाएका हुन् ।

बैंकको सीईओ नियूक्त भएको केही समयपछि नै उनको सञ्चालक समितिसँग विवाद बढेको थियो । सोही विवाद बढ्दै गएर चरम रुप लिएपछि उनले बीचमै बैंक छाडेका हुन् । ३९ महिनाको कार्यकालमा बैंकभित्र एक अर्ब भन्दा बढी घोटाला गरेको आरोप उनीमाथि लागेको छ ।

मोटो कमिशन खाएर मनपरी ढंगले कर्जा लगानी गर्ने तर सो कर्जा उठाउन ताकेता नगर्ने बरु उल्टै डिफल्टरहरुसँग मिलेर बैंकलाई थप धरासायी बनाउन लागेको आरोप एकजना सञ्चालकले लगाएका छन् ।

२७ वटा बाणिज्य बैंकहरु मध्ये सबैभन्दा कमजोर बैंकको रुपमा रहेको सेञ्चुरी बैंकको वित्तीय विवरण टिठलाग्दो देखिन्छ । बेरोजगार भएर घरमै थन्किएका बेला विभिन्न शक्तिकेन्द्र धाएर तथा सञ्चालकहरुको चाकडी गरेर बैंकको सीईओ हात पारेका गौतमले हरेक बर्ष कम्तीमा १५ प्रतिशत लाभांश दिने कवुलियतनामा गरी जागीर खाएको बताइन्छ । तर ६ प्रतिशत लाभांश दिन पनि हम्मेहम्मे परेपछि उनी बाहाना बनाएर भागेको आरोप एक सञ्चालकले लगाए ।

ती सञ्चालकका अनुसार, उनलाई सञ्चालक समितिले केही व्यवसायिक लक्ष्यहरु दिएको थियो । ती लक्ष्यहरु कुनैपनि हासिल भएका थिएनन् । गौतमले कोभिडका कारण लक्ष्यमा पुग्न नसकेको बाहाना गदै आएका थिए । उनी सीईओ भएर बैकमा भित्रिएपछि बैंकका राम्रा कर्मचारीहरुलाई धमाधम निकालेका थिए ।

गौतम माछापुच्छ्रे बैंकको पनि प्रमुख कार्यकारी भएका थिए । त्यहाँबाट बाहिरिएपछि डेढ वर्ष उनी खाली थिए । त्यसपछि सेञ्चुरी आएका थिए । सुरुमा उनले नेपाल बैंकबाट बैकिङ करियर सुरु गरेका थिए । त्यसपछि तत्कालिन नेपाल इन्डोसेज बैंक छाडेर एसबीआई गएका थिए ।

एसबीआईबाट माछापुच्छ्रे बैंक हुँदै उनी इक्रा नेपाल लिमिटेडको प्रमुख कार्यकारी अधिकृतसमेत भएका थिए ।