देउवा पुगे शीतलनिवास, विज्ञप्ति सच्याउँदै राष्ट्रपति कार्यालय

२९ असार, काठमाडौं । नेपाली कांग्रेसका सभापति शेरबहादुर देउवा राष्ट्रपति कार्यालय, शितलनिवासमा प्रवेश गरे पनि शपथग्रहण स्थलमा पुगेका छैनन् ।

राष्ट्रपति बिद्यादेवी भण्डारीले संविधानको कुनैपनि धारा उल्लेख नगरी ‘सर्वोच्च अदालतको फैसला अनुसार प्रधानमन्त्रीमा नियुक्त गरिएको’ विज्ञप्ति जारी गरेको भन्दै नेपाली कांग्रेसका सभापति एवं संसदीय दलका नेता शेरबहादुर देउवाले विज्ञप्ति नसच्चिएसम्म शपथ लिन मानेका छैनन् ।

यसअघि बूढानीलकण्ठस्थित आफ्नै निवासमा बोलाएर देउवाले मुख्यसचिव शंकरदास वैरागीलाई प्रधानमन्त्री नियुक्ति नसच्चिएसम्म शपथग्रहण नहुने बताएका थिए । राष्ट्रपतिले संविधानको धारा नै उल्लेख नगरी विज्ञप्ति जारी गरेपछि देउवाले आपत्ति जनाएका हुन् ।

आफू संसदीय दलको नेताको रुपमा प्रम नभएको र धारा ७६ (५) अनुसार नियुक्त हुनुपर्ने भन्दै देउवाले असहमति जनाएका हुन् ।

देउवाको अडानपछि राष्ट्रपति कार्यालयका कर्मचारीहरुले विज्ञप्ति सच्याउन थालेका छन् । शपथग्रहण स्थलमा उपराष्ट्रपतिसहित पूर्व प्रधानमन्त्रीहरु, प्रधानन्यायाधीश, सभामुख, विभिन्न दलका नेता, उच्च पदस्थ सरकारी अधिकारी लगायतले शपथग्रहण कतिबेला होला भन्दै कुरेर बसेका छन् ।