किन हतार गरे देउवाले विश्वासको मत लिन ?

३ साउन , काठमाडौं । प्रधानमन्त्री शेरबहादुर देउवाले प्रतिनिधिसभामा आजै विश्वासको मत लिने भएका छन् । फागुन २८ गते सर्वाेच्च अदालतको परमादेशबाट पुनस्थापित प्रतिनिधिसभाको आज बस्ने पहिलो बैठकबाटै प्रधानमन्त्री देउवाले विश्वासको मत लिने भएका हुन् ।

प्रमुख प्रतिपक्षी दल एमालेले देउवालाई विश्वासको मत नदिने निर्णय गरेपनि असन्तुष्ट पक्षका नेताहरु भने संसदलाई पूर्ण कार्यकाल बचाउन भन्दै विश्वासको मत दिने पक्षमा छन् ।

उता, जनता समाजवादी पार्टीमा पनि महन्थ– राजेन्द्र पक्षका असन्तुष्ट आधा दर्जन नेताहरुले संसदलाई पूर्ण अवधि चलाउन कित्ता परिवर्तन गरेका छन् । हिजो बसेको उपेन्द्र यादव पक्षको संसदीय दलमा उनीहरु उपस्थित भएकाले आजै विश्वासकाे मत लिंदा उपयुक्त हुने ठहर देउवाले गरेका छन् ।

अहिले सबै पक्षले प्रतिनिधिसभा फेरि विघटन नहोस् भन्ने नै चाहेकाले हतार गरेर विश्वासको मत लिन लागेको पनि देउवा पक्षीय नेताको दावी छ । स्वयं केपी ओलीसमेत अहिले प्रतिनिधिसभा विघटन भएर नयाँ निर्वाचनमा जाँदा आफूलाई समेत ठूलो आघात पुग्ने भन्दै माधव नेपाल पक्षले विश्वासको मत दिओस् भन्ने पक्षमा छन् ।

देउवालाई अपुग मत हाल्ने गरी नेपाल पक्षका नेताहरुलाई सहज वातावरण बनाइदिने दाउ ओलीको देखिन्छ । त्यसैले आजै देउवाले विश्वासको मत लिने अवस्था रहेको छ । नेता नेपाल पक्षले पनि आवश्यक मत मात्रै देउवाको पक्षमा दिने र बाँकी तटस्थ रहने नीति अपनाएको बताइएको छ ।

चाहिने जति मत दिनका लागि आफूहरु तयार रहेको सांसद रामकुमारी झाँक्रीले बताएकी छन् । हामीले प्रधानमन्त्रीलाई विश्वासको मत दिने पत्र बुझाइसकेका छौं, त्यसैले आजै लिने कार्यक्रम बनाइएको पनि उनले बताइन् ।

संसदीय व्यवस्था मन्त्री ज्ञानेन्द्रबहादुर कार्कीले आजकै बैठकमा यो प्रस्ताव प्रस्तुत गर्न कार्यव्यवस्था समिति बैठकमा दर्ता गराइसकेको संसद सचिवालय स्रोतले बताएको छ । आज बेलुकी ४ बजे संसद अधिवेशन आह्वान भएको छ ।